Juvenal Nava ta despedi di Comite Olimpico Arubano despues di 15 aña di dedicacion

ORANJESTAD (AAN):  Diabierna den sala di reunion na oficina di Comite Olimpico Arubano (COA), a hiba manera tur diabierna ta haci,

e reunion general di Direccion di Deporte. Locual cu a haci e reunion special, ta cu na final a tene momento di reconocimiento y despedida di nan  gran colega Juvenal Nava.

                        Juvenal, mihor conoci como “Nal” a forma parti di e ekipo di e comision tecnico di COA pa e ultimo 15 aña, unda cu e tabata tin un gran aporte na e exito di nos atletanan den e ultimo ciclonan olimpico.

                        Mayoria federacion deportivo cu ta forma parti di e famia di COA, sigur a ricibi bishita di Nal, como e tabata forma parti di e team tecnico cu tabata observa entrenamento di nos atletanan di alto rendimento. Ademas di tur su aporte riba nivel tecnico, Nal ta un persona semper alegre, cu tur hende ta respeta pa su gran conocimento di deportenan y su manera trankilo di maneha tur situacion.

                        Na final di e momento special aki, unda Nal a ricibi entre otro un plakkaat como recuerdo di su añanan di servicio y dedicacion pa deporte y COA, a nombre como e prome miembro honorario di COA su Direccion di Deporte, y semper e lo keda envolvi den nan eventonan.

                        Nal mes a duna di conoce cu apesar di su decision pa dedica su tempo mas na su famia, en especial su nietonan, e semper ta dispuesto di duna un man unda necesario, como COA y deporte semper tin un lugar special den su curason.

Fuente: Comite Olimpico Arubano