AVB a celebra su “Award Night AVB” unda a reconoce e hungadornan talentoso

Presidente di AVB, Randolph Lacle:

*Cu a destaca den ultimo campeonato 2023-2024 

ORANJESTAD (AAN) – Randolph Lacle, Presidente di Arubaanse Voetbal Bond, den un entrevista cu DIARIO, en ocasion di e “Award Night AVB”, cu a tuma lugar den Cas di Cultura, Diasabra ultimo 14 di september, a elabora tocante e evento aki.

            El bisa cu durante e anochi aki a duna reconocimento na tur e hungadornan talentoso, cu a destaca den e ultimo campeonato, esta 2023-2024, cuminzando pa e edad di 5 aña te cu 20.

            Manera ta conoci AVB tin hopi categoria, tanto masculino como femenino, y den tur tin talentonan cu ta bin dilanti, hungadornan cu hopi talento, y mester stimula nan pa sigui bay dilanti den futbol.

            Ademas a duna reconocimento na referee y otronan cu a bin acerca. AVB tin reconocimento special na e clubnan cu a cumpli 75 aña activo, pero e aña aki no tin esey,  Lacle a bisa.

            “Nan ta wordo yama ‘Platinum Member’ y nan ta haya un reconocemento special semper, durante Award Night, pero no tabata e caso e anochi aki”, Lacle a reitera. E clubnan hubenil si a bin dilanti, pasobra nan ta e futuro, mester di nan y mester duna nan e animo pa nan sigui bay dilanti den futbol. “Y locual ta hopi importante pa nan, y nan conciente di dje, ta cu awendia futbol ta duna hopi oportunidad. Mas hoben ta hayando oportunidad di bay den exterior; e mundo a bira hopi global, pues e distancianan, relativamente, ta mustra cortico y esaki ta un desaroyo positivo. Pues, futbol no ta di Aruba so pero ta parti di e mundo eyfo tambe”, Lacle, Presidente di AVB a señala.