Interes tabata grandi den e Blue Race di Fundacion Autismo Aruba

ORANJESTAD (AAN): Diadomingo mainta trempan a tuma lugar e actividad di Blue Race,

y esaki a start y finaliza riba e caminda pabao di Amsterdam Manor Resort na Eagle Beach.

   Carolina Thielsman presidente di Fundacion Autismo Aruba.  Diadomingo mainta tabatin e diez edicion di ‘Blue Race’. 

   Despues di 2 aña y mey di tabata stagna debi na pandemia di Covid-19, awor na November 2022 nan a logra di organiza esaki bek y e ta un evento cu a sell-out rapido.  E 500 cupo a yena rapidamente, y pesey nan a dicidi na habri 250 cupo mas, y esakinan tambe a bay rapidamente.

   Esey sigur ta un bunita momento pa nota cu tin hopi interes den comunidad, y cerca e atletanan local pa lanta mainta trempan y bay forma parti di un actividad asina.

   Un biaha mas masha danki na tur esnan cu a participa, y na nan patrocinadornan y boluntarionan cu a haci esaki posible.

   Blue Race ta pa crea un momento di visibilidad den e lucha pa tene combersacion rond di autismo mas largo posible.  Esaki ta algo cu ta stimula combersacion riba e tema, y asina hendenan ta haya sa mas di e organizacion.  Nan meta principal ta pa crea concientizacion den pueblo, y cu esaki nan ta yuda recauda fondo tambe.