ORANJESTAD (AAN): Manera ta costumber pa hopi aña caba, e club di natacion Aruba Dolphins Swimming ta organiza su competencia internacional yama Aruba Dolphins Invitational.
E aña aki nan ta celebrando nan di 20 aniversario organizando e competencia. Un cantidad di no menos cu 312 atleta di 9 diferente equipo representando 4 pais lo bataya e fin di siman aki na Piscina Olimpico Roly Bisslik pa mira ken lo bira campeon di e 20th Aruba Dolphins Invitational.
Preparacion di e landadornan a cuminsa for di comienso di e aña escolar y expectativanan ta halto. E equiponan di exterior cu lo ta presente ta B-Train Swimming di Canada, Typhoon Swimming Team di Curacao, Sithoc Swim Club di Curacao, Orca Swim Club di Curacao y Delfins Swimming Club di Bonaire. Giants Aquatics, Stingray Swimming y Aruba Dolphins ta e equiponan cu lo representa Aruba.
E programa ta como lo siguiente: Diabierna atardi 4 november 2022 warm-up lo start 5 pm. Apertura y desfile lo ta 6 pm y pa 6.30 pm e careda nan lo inicia. E evento nan cu lo worde landa e dia aki ta 100M Back, 50M Freestyle, 400M IM y 200M, y Medley Relay.
Diasabra 5 november 2022 parti mainta warm-up lo start 7.30 am y careda lo inicia 8.30 am. E evento nan cu lo worde landa e mainta aki ta 400M Freestyle, 50M Butterfly, 100M Backstroke, 200M Breaststroke, 100M Freestyle y 200M Mixed Free Relay.
Diasabra 5 november 2022 parti atardi warm-up lo start 4.30 pm y careda lo inicia pa 5.30 pm. E evento nan cu lo worde landa e atardi aki ta 50M Backstroke, 200M Freestyle, 200M I.M, 100 Breaststroke, 200M Mixed Medley Relay.
Diadomingo 6 november 2022 warm-up lo start pa 8.30 am y careda lo inicia 9.30 am. E evento nan pa e dia aki ta 200M I.M, 200M Backstroke, 50M Breastroke, 100M Butterfly y 200M Free Relay.
Entrega di premio lo tuma lugar diadomingo merdia despues di e competencianan na piscina mes.
Un danki ta bay na tur nos sponsors nan pa por haci e competencia aki uno posibel Tri-Bike Aruba, Meta Corp, Setar NV, Refeneria di Aruba, Banco di Caribe, Aeropuerto Internacional Reina Beatrix, SWIFT distribution cu su producto nan di Cerave y Surface, Divino Aruba, QF Global Network y Giannis Group.
Directiva di Aruba Dolphins Swimming And Waterpolo Club ta invita pueblo di Aruba pa bin presencia e competencianan di natacion aki cu ta priminti di bira uno sumamente interesante.
