Impresionante tabata e apertura di Weganan Escolar 2023

Minister Endy Croes:

ORANJESTAD (AAN):: Diabierna ultimo, a tuma luga e gran apertura di Wegannan Escolar 2023 na Compleho Deportivo Frans Figaroa na Noord. Un proyecto presenta pa Ministerio di Enseñansa y Deporte, IBiSA y Gabinete Wever – Croes II.

            E fiesta deportivo a cuminsa pa 5 or di atardi cu e “warm up jam” dilanti Compleho Deportivo Frans Figaroa na Noord, sigui cu entretenimento di dj, brassband hunto cu e mascota Wiwi cu a saca potret cu e muchanan. 

            Pa 6 or di atardi e ceremonia oficial a inicia cu entrada di Grupo di Scouting San Dominicio di Noord cu bandera di Aruba, sigui pa entrada di NGS Brassband, Grupo Multicultural Aruba bou guia di John Freddy Montoya y entrada di e 45 scolnan cu ta participando y mas di 1000 alumno.

            E bunita y colorido show di apertura tabata den man di NLG y NTG bou guia di Sra. Marisol Peña y Gihae Gymnastics.  Himno nacional di Aruba a wordo interpreta pa Rocco Franken, sigui cu discurso di Prome Minister di Aruba Sra. Evelyn Wever – Croes y Minister di Enseñansa y Deporte Sr. Endy Croes.

            E hoben triatletanan Rebecca y Christiaan Jansen a drenta stadion cu e antorcha olimpico. Despues cu Rebecca Jansen a cende e candela escolar, Minister Endy Croes a declara Weganan Escolar 2023 oficialmente habri. Credo di Weganan Escolar a wordo lesa pa e ekipo campeon di volleyball di Weganan Interinsular 2023.

            E sake di bala cu a tuma luga meymey di veld, na unda cu Presidente di Parlamento mr. Edgard Vrolijk, Minister President Evelyn Wever - Croes y Minister Endy Croes a scop e bala y asina duna inicio na e dos simannan di competencia escolar.

            Despues di e ceremonia di apertura, a sigui cu e partido di futbol entre Scol Basico Washington y Pius X School. E banda musical Tsunami a clausura e apertura di Weganan Escolar cu nan tremendo musica y a pone un ambiente total. 

            E meta di Weganan Escolar Aruba ta pa promove deporte bou di nos alumnonan di scol preparatorio, basico y secundario. Minister Endy Croes a expresa cu deporte ta e vehiculo pa preveni cu e muchanan ta bay riba caya. Hunto nos ta logra un comunidad mas saludabel y activo y nos ta desea tur mucha y hoben cu ta participa den Weganan Escolar 2023 hopi exito. Sigur tabata bunita pa presencia e alegria y entusiasmo di e hobennan pa competi cu otro cu e speransa pa fortifica laso di amistad y hermandad.