Hobencita di apenas 15 aña procedente di Bonaire a duna fenomenal show di Drifting

Publico encanta riba Diabierna anochi --- ORANJESTAD (AAN): Riba Dia di Himno y Bandera a tuma lugar na International Raceway Park Palo Marga, ademas di caredanan di dragrace, tambe competencia di Drifting.

   Como cu tabatin varios motorcycle procedente di Curaçao y Bonaire cu a bin Aruba pa participa den Rides pa Dia di Himno y Bandera, a nota cu algun di nan a inscribi pa competencia di Drifting tambe.

   E no tabata djis un competencia di Drifting pa auto of brommer, sino el a wordo acompaña cu e celebracion di 20 aña di Jason Fun, kende ya tin 4 lustro envolvi den e mundo local di drifting.

   E anochi di competencia realmente tabatin un bon espectaculo di Drifting!  Y algo cu a presenta manera un sorpresa ta e hecho cu un dama hopi hoben a inscribi tambe pa Drift cu un motorcycle cu yama ‘Bonaire Drift Princess’.  E motorcycle di dje color blanco cu zebra-pattern pinta riba dje, tabata parce na prome bista di ta demasiado grandi pa e dama hoben Sabelle Saragoza, procedente di bario di Antriol na Bonaire.

   Sinembargo asina cu e dama hoben di 15 aña a subi e motorcycle, su estatura no tabata ningun clase di estorbo pa su dominio, enfoque, y presentacion dilanti publico grandi na International Raceway Park Palo Marga.

   Publico a keda entusiasma pa mira loke e dama hoben aki a haci, su dominio perfecto cu e sliding di e motorcycle.  Tur hende a saca nan smartphone pa asina cuminza graba su show.  Sin duda Sabelle su mayornan mester ta orguyoso di e habilidad di nan yiu muher, y tambe sigur su bario Antriol, y su docente- y alumnonan na School SGB Bonaire.

   Na final di su presentacion, publico presente a dune un aplauso fuerte pa su show riba pista.  Hopi hende a comenta, cu di awor caba cu e tin 15 aña e ta asina fenomenal riba dominio di un motorcycle.  Imagina ora e yega 18 aña y cu porfin legalmente e por core riba caminda.  Su habilidad lo bay ta e ora aun mas avanza.

   Dos aña pasa el a yega di bin Aruba caba y a duna show riba Quadracer (ATV).  E tempo ey e tabatin 13 aña.

   Felicitacion na e mayornan cu tambe tabatin matching uniform cu nan yiu muher bisti.  Na final el a ricibi un bunita plaquette como recuerdo.