ORANJESTAD (AAN): Gihae Tang Soo Do Aruba a confirma cu nan lo bay cuminza training yama Ladies’ Practical Self-Defense.
DIARIO a compronde cu e training aki tin como meta pa empodera damas y muchanan muher hoben, pa medio di training di tecnicanan practico di defensa personal di Tang Soo Do, cu por worde aplica den situacionnan real di bida.
Participantenan lo worde guia pa medio di metodonan efectivo pa amplia nan conciencia, fortifica nan confianza, y aumenta nan habilidad pa defende nan mes ora necesario.
Gihae Tang Soo Do ta ricibi alumnonan di 3 aña bay ariba pa forma parti di e programa di entrenamento pa tur edad, e programa ta dividi den varios grupo pa garantisa cu tur studiante por desaroya na un nivel adecuado pa nan edad y habilidad: (*) Tiny Tigers: 3 pa 4 aña, (*) Little Dragons: 5 pa 7 aña, (*) Youth Warriors: 8 pa 12 aña, (*) Teen Leaders: 13 pa 17 aña, y (*) Adult Program: 18 aña bay ariba.
E structura di edad ta permiti cu cada studiante ta ricibi training adapta riba disciplina, coordinacion, confianza, defensa personal y desaroyo fisico den un ambiente sigur y positivo.
Alaves nanm kier invita pueblo di Aruba pa bin conoce nos deporte na nos competencia nacional dia 6 di December 2025 na Centro Deportivo Betico Croes conoci tambe como Sporthal cuminsando for di 9:00 di mainta pa 4:30 di atardi, entrada ta gratis. Pa mas informacion di Tang Soo Do por tuma contacto cu SBN Melissa Noguera na 593-9881.
