Gran final den torneo 4x4: Taxi Boys vs Biba Lekker!

ORANJESTAD (AAN):  Awe Diasabra 3 di mei, cuminsando pa 8’or di anochi, e famoso Domino Square Garden lo ta e scenario p’e gran final dje torneo 4X4,

ora cu e “burdugunan” di Taxi Boys enfrenta e “corta-coriente-nan” di Biba Lekker! Cos ta hot, pero cayente di berdad! E prome encuentro, esun entre Biba Lekker y Sero Blanco, a bay den tension increibel! Como ultimo recurso, Biba Lekker a diseña un strategia nobo: corta coriente, paga luz, y laga tur hende fria pa asina haci un comeback y gana cu score preta di 21-20. E palabra “Time-out” a haya un significado nobo! Antes tabata bay sconde den WC, pero awor aki a para bira style di paga luz y cuminsa resa!

            E di dos encuentro, esta esun entre Taxi Boys y Pluma Gang, lo drenta historia di domino aki na Aruba como e abuso mas grandi di tur tempo: sin piedad, e burdugunan taxista a masacra e pober “plumeronan” cu score impactante di 21-10! Awo, e gran final lo bay dicidi ta cua pegadonan di piedra mas poderoso dje 4 ekiponan aki. Tin papia cu e torneo aki lo ta un “pilot-project” pa un futuro champion’s league den domino. Ken sa, keda pendiente.

            Pues shonnan, wanta duro pasobra diasabra awor, 3 di mei, cuminsando pa 8’or di anochi, e sambombaso final lo tuma luga aya n’e mundialmente famoso Domino Square Garden net n’e grens entre Calabas y Kudawecha. Manera semper, entrada ta completamente gratis pa publico amante di domino en general, y e snacknan lo lora totalmente pornada durante halftime! No perde e evento sensacional aki, yegaaaa!