ORANJESTAD (AAN) E atleta di Taekwondo, esta Maelynn Fradl, den entrevista cu DIARIO a
menciona cu el a clasifica pa e weganan hubenil Panamericano 2025, cu lo tuma lugar na Asuncion, capital di Paraguay.
Su trayectoria a cuminza dos aña pasa cu el a clasifica den weganan clasificatorio, na Mexico y Peru. El a keda entre e miho seisnan cu e por a clasifica.
El a comenta cu e tin un trayectoria largo, unda el a prepara na Honduras y na Aruba cu diferente atleta, y tambe na Mexico y Cuba y asina a yega na unda e ta aworaki.
Maelynn a cuminza hunga cu nuebe aña y aworaki tin 18 pa 19 aña den deporte, y claro, como un dama e tin hopi mas reto y como un persona di “peso pisa” e tin cu entrena mas duro.
Den e paisnan cu el a bishita a bringa cu atletanan di diferente pais, y nan ta di nivel halto, pesey su nivel mester ta super bon pa e por gana e peleanan; sino, e lo no a logra clasifica.
E ta gusta deporte for di chikito. Su mama a pone den les di ballet pero e no tabata sinti confortable, anto el a pone den Taekwondo cu ta e deporte cu e ta stima. E gusta bringa profesionalmente. E semper a wak su ruman hunta futbol, y el a haya medaya y cup cu su team, y el a haya estimulo pa haya medaya individual y p’esey su mama a hinke den Taekwondo.
Su siguiente stap despues di a hunga na Asuncion den weganan Panamericano, su enfoke ta competi na Rio di Janeiro Open, Panamericano Damas, e mundial Seniors cu ta na China, entre otronan. Su meta mas grandi ta yega na Olimpiada 2028.
