Gran apertura di Weganan Escolar 2023 den Compleho Deportivo Frans Figaroa

ORANJESTAD (AAN): Diabierna atardi a tuma e gran apertura di Weganan Escolar 2023, cu un tremendo “warm-up jam” dilanti Compleho Deportivo Frans Figaroa na Noord.

E ceremonia oficial a cuminsa cu un desfile di e 45 scol participante y entrada di e antorcha olimpico.

Cerca di mil alumno di scolnan  preparatorio, scol basico y scol secundario di Aruba ta bay enfrenta otro den competencianan amistoso den 7 diferente disciplina, entre otro, badminton, functional fitness, volleyball, basketball, futbol, beach tennis y baile cultural.

E mascota Wiwi a saluda e deportistanan, como publico presente cu a bin apoya nos muchanan.

E fiesta deportivo a inicia cu entretenimento di dj, brassband, Tsunami tambe tabata den stadion pa deleita tur presente cu nan tremendo musica.