Gihae Gymnastics a participa den Campeonato na Panama y tambe na Peru ganando 65 medaya

Melissa Denise Noguera, Presidente:

• Un logro enorme di cual e ta hopi orguyoso 

ORANJESTAD (AAN)- Melissa Denise Noguera, Presidente di Gihae Gymnastics, durante un conferencia di prensa convoca na nan sede na Barcadera, a expresa cu orguyo con su participantenan a logra resultadonan grandi, cu nan participacion na, entre otro, e Campeonato Panamericano na Panama, y tambe nan na e Copa Estrella Gimnastico na Peru.

   Gihae Gymnastics ta ofrece muchanan muher di tur edad, na Aruba, e chens di sobresali den e disciplina di gimnasia artistico.

   “Gihae Gymnastics a participa den dos competencia den vacancy. Nos a bay na e ‘Competencia Panamericano de Clubes di USAG’ Na Panama, y tambe Copa Las Americas, cu ta na Lima Peru. Na e Campeonato Panamericano nos a bay cu 26 atleta, anto na Peru nos a bay cu 24 atleta. Total na Panama e muchanan a gana 65 medaya y e di Dos Subcampeon Panamericano loke ta un logro hopi grandi pa nos, ya cu e tabata di hopi nivel.

   Tabata tin 1.750 Gimnasta, 22 pais, 111 club, anto Gihae, cu a bay cu 26 atleta a logra un bon papel pa nos cu 65 medaya.

   “Na Panama, nos a competi cu nivel 1 te cu 8, anto na Peru nos a competi cu e nivel di di stars di e muchanan mas chikito nivel 1 te cu 6 y 8”,  Melissa Noguera a duna di conoce.

   El a agrega cu esaki ta e prome biaha cu Gihae ta competi den un Copa Panamericano, y a reitera cu e nivel tabata hopi halto, y Merca tabata tey loke a haci cu e competencia tabata hopi fuerte, pero el a bay  hopi bon.

   “Mi kier a gradici na tur sponsor, tur esnan cu a yuda nos atletanan di un of otro manera, y tambe na e mayornan cu semper ta sostene e scol pa sigui bay dilanti”, Melissa Denise Noguera, Presidente di Gihae Gymnastics a conclui.