Atletanan di Aruba a termina competencia di natacion cu un medaya mas

Competencia nan na Republica Dominicana

ORANJESTAD (AAN): Diasabra anochi na competencianan di XXV Juegos Centroamericanos y del Caribe na Republica Dominicana, a conclui e competencia di natacion y e atletanan di Aruba a percura pa tur hende corda riba Aruba, cu diferente resultado fuerte den final A y un medaya di brons mas pa Patrick Groters.

   Den e final di 200m backstroke, Patrick un biaha mas amustra su nivel cu un di 3 luga cu un tempo di 1:59.91.

   Ocean van Loon tambe a landa e final A di 200m y a keda na di 9 luga cu un tempo di 2:15.43.

   Den e final A di e 50m Butterfly a termina na di 6 luga Avi Tromp 27.65.

   Inald Fernandes a logra un di 10 luga den e final A di 200m Free.

   Finalmente Mikaela van den Berg a keda na di 17 luga den e 50m Butterfly cu un tempo di 29.02,

   Delegacion di Aruba, conoci como ‘TEAMARU’ por mira bek na un participacion exitoso den natacion, cu un grupo hoben cu a logra bon resultado y gana hopi experiencia competitivo. Comite Olimpico Arubano (COA) ta gradici e ekipo completo pa nan gran esfuerso y bon trabao!

   E potretnan aki pa cortesia di Comite Olimpico Arubano.