Exitoso Meet & Greet di grupo Shoco Legends cu a core rond di Aruba

ORANJESTAD (AAN): Riba Dia di Rey, e grupo local di bikers, conoci como ‘Shoco Legends’ a tene nan ‘Meet & Greet’ den forma di un paseo rond Aruba. 

Nan a haci esaki, debi cu pa 2 aña largo relaciona cu e pandemia, nan no por a haci nada.  Pesey a bin cu e idea pa tene un Meet & Greet pa topa Bikers.

   E asina yama Meet & Greet aki ta pa topa tur hende, pa asina nan tene un fabuloso ride riba un dia importante manera Dia di Rey.  Nan no a cobra placa ni a exigi inscripcion, y tur hende cu motorcycle por a yega cu shirt oranje of rood-wit-blauw pa participa.

   Nan a sali for di Faro di California banda di 2:00 pm y a core rond di Aruba pa asina tur hende join e Ride aki, pasando dilanti Hotelnan, sigui pa Playa, y a haci un stop na Paradera Mall.  Tabatin algun wega.  Despues a sigui bay te na WEB Aruba NV, pasa caminda patras y despues subi Green Corridor na Pos Chikito bay La Granja, y a sigui core caminda patras te rotonde cerca di Palo Marga, unda ta bay zuid yega te Julio’s, y despues bin pabao y para na Cura Cabay.

   Despues a bin pabao te na Royal Plaza, y aki ta pasa door di Caya Grandi di Caya Betico Croes, y bay para na Baby Back Grill cu ta e cas di Shoco Legends, cu banda musical tambe.