Exitoso competencia recien di Landamento Artistico na Aruba

ORANJESTAD (AAN): Recientemente Aruba Aquatics Federation exitosamente a organiza e prome competencia di Landamento Artistico na Piscina Olimpico Roly Bisslik na Savaneta.

  E evento excitante aki a wordo organiza na honor di Dia di Betico, celebrando tanto excelencia atletico, y e herencia cultural di e isla.

   E competencia a demostra e talento increible di e 25 atletanan, cu a participa den diferente categoria di edad.  Tabatin ‘Beginners’, ’10 & Under’, ’12 & Under’, Youth, Junior, y Senior.  Participantenan a demostra nan habilidadnan tecnico y prestacion artistico den figuranan, solos, y duets, y team routines, impresionando publico cu nan sincronizacion, precision, creatividad, y forza.

   Un total di 17 rutina a wordo presenta den awa, y atletanan a wordo evalua door di un panel di hurado basa riba nan habilidad tecnico, flexibilidad, dificultad di rutina, coreografia, expresion facial, y sincronizacion.  Hopi di e rutinanan aki ta parti di e preparacion pa e PanAm Aquatics Championship na Medellin (Colombia) na luna di Mei, unda e team di landamento artistico di Aruba lo bay competi riba escenario internacional.

   Atleta Elite tambe a duna presentacion: Tin di menciona cu durante e competencia aki tambe tabatin un presentacion special duna pa Kyra Hoevertsz, kende ta e landador artistico elite di e isla, cu a bin duna un show di rutina solo nobo.  Kyra lo competi cu e rutina aki na World Cup Games na Paris na luna di Maart, representando Arruba riba un di e escenarionan mas grandi di e deporte.  Su presencia na e evento a sirbi como un inspiracion pa atletanan hoben y e comunidad local di landamento artistico.

   Aruba Aquatics Federation ta manda gradici tur atleta pa nan trabao duro y pasion, e hurado- y oficialnan pa nan tempo di experticio, e mayornan pa nan encurashamento, y tur boluntario cu a yuda haci esaki posibel.