Elevando e nivel di deporte na nivel general a traves di aporta na capacitacion di e federacionnan di deporte

Comite Olimpico Arubano cu curso di capacitacion pa tur Federacion Deportivo

ORANJESTAD (AAN):  E trabou di nos dirigentenan deportivo sigur no ta facil. Awendia tin tanto aspecto importante cu mester tin na consideracion, pa por logra e obhetivo final cu aporta na desaroyo di deporte riba tur nivel.

            Comite Olimpico Arubano ta reconoce esaki y despues di a haci un encuesta grandi cu a termina na 2022, a constata e areanan principal cu mester haya atencion. Pa por ofrece un oportunidad na tur federacion di COA pa haya capacitacion den e areanan aki, Direccion di Desaroyo a organisa un serie di tayernan interactivo.

            Sr. Patrick Werleman cu ta director di Desaroyo na COA, a prepara un serie di anochi di lesnan presencial unda profesionalnan local a bin y elabora riba nan ramo di expertisio. Hunto cu Anastasia van Daal cu ta haci su stage na COA cu e Direccion di Desaroyo, a prepara tur cos y a duna inicio na e serie di tayerna aki na luna di 2024.

            Despues di analisa e encuesta, a logra identifica 7 area importante cu mester di atencion. Primeramente, ta mira cu e federacionnan ta compronde e importancia di tin bon gobernansa, cual ta alinea cu e manera di pensa di COA..

            E prome 3 cursonan a enfoca riba e aspecto aki. Banda di bon gobernansa, e siguiente tema cu sigur a bin dilanti serca tur federacion ta e aspecto financiero. Tur federacion ta un asociacion como entidad legal, cual kiermeen cu nan tambe mester entrega relato financiero y sa con pa trata cu administracion.

             E prome 3 temanan pues ta trata hopi di maneho interno di un federacion, cu sigur mester ta corecto y actualisa, pa asina por fungi debidamente. E siguiente tema cu a ricibi hopi atencion ta e parti legal y di “compliance”, cu ta forma parti directo cu e parti di bon gobernansa y e debernan financiero, manera impuestonan.

            Despues di e temanan cu ta atende mas cu e maneho interno di federacion deportivo, a bay mas na temanan cu tin hopi relevancia cu otro gruponan di interes, cambiando e enfoke mas pa e parti di relacionnan externo. Pa cu e parti aki, a pone hopi enfasis den e importancia di comunicacion, mercadeo y e tema di “branding”.

            Un federacion cu sa promove su mes sigur ta logra ricibi hopi beneficio di haci esaki. Banda di esaki, tambe a ricibi un bon curso riba e tema di maneho di eventonan, como casi tur federacion deportivo local ta organisa eventonan na nivel nacional pa asina duna atletanan local un experiencia di por competi den un manera oficial. Claramente e importancia di tin bon relacion cu tur grupo di interes ta esencial y con pa percura pa crea relacionnan bon estableci ta crucial. Pa e motibo aki a duna atencion tambe na e parti di con pa maneha colaboracionnan riba un nivel strategico, bou di e capa di “strategic partnership”.

            E ultimo tema principal cu a ricibi atencion, y despues di a duna e tayer a trece hopi pregunta y entusiasmo di e participantenan, ta e parti di strategia digital. E ta un hecho cu e mundo di awendia ta evoluciona mas rapido cu nunca pa motibo di e avancenan digital. E mundi di deporte tambe ta experiencia esaki, cu ta haci e necesidad di ta capacita den tur cos digital ta un rekisito pa desaroyo. Ademas di e avancenan general manera inteligencia artificial, lo experiencia hopi avance pa loke ta tecnologianan deportivo.

            E ultimo tema principal cu a ricibi atencion, y despues di a duna e tayer a trece hopi pregunta y entusiasmo di e participantenan, ta e parti di strategia digital. E ta un hecho cu e mundo di awendia ta evoluciona mas rapido cu nunca pa motibo di e avencenan digital. E mundi di deporte tambe ta experiencia esaki, cu ta haci e necesidad di ta capacita den tur cos digital ta un rekesito pa desaroyo. Ademas di e avancenan general manera inteligencia artificial, lo experiencia hopi avancenan pa loke ta tecnologianan deportivo. 

            COA ta contento pa mira e acogida positivo y ta den proceso pa prepara e siguiente serie di tayernan unda lo profundisa mas den e topiconan mas importante. Di parti di COA, ta gradici tur orador cu a tuma tempo y boluntariamente aporta na e iniciativa aki y tur participante cu a atende e curso. Nos ta contento pa mira cu e federacionnan tin interes di sigui cu capacitacion, cu sigur lo tin un efecto favorabel pa e desaroyo di deporte na Aruba.