Exitoso competencia di Color Kids Run organiza pa Eagle 297 Runners

ORANJESTAD (AAN): Recientemente den Stadion Nadi Croes Crismo Angela na Rooi Bosal,

e organizacion dinamico di Eagle 297 Runners a organiza nan di segundo “Youth Eagle in Color Kids Run”, cu ta competencia di coremento.

   DIARIO a nota cu un cantidad di mayor tabata present den stadion pa asina anima e hobennan cu a haci nan best e anochi trempan aki.

   E headcoach, Michael Maduro a indica cu aña pasa e competencia aki a wordo honra como ‘Evento di Aña” di Patrishi Sports.  E aña aki a haci mes esfuerzo pero cu mas creatividad.

   Como cu na Aruba, mayoria di caredanan ta ser teni sea mainta of atardi, e biaha aki Eagle 297 Runners a bin cu e idea pa organiza esaki anochi trempan, y usa un lugar cu ta diferente cu tur otro.  Pesey a haci un survey rond di e isla, y a escoge e veld di Stadion Nadi Croes Crismo Angela pa tene e caredanan aki.

   Casi 150 hoben tabata presente pa asina competi den e evento, pues esey a indica cu e tabata un evento exitoso.  Headcoach Michael Maduro ta haci suplica pa mas mucha cuminza competi den caredanan na pia, como cu e ta bon pa nan salud, y nan lo keda activo tambe constantemente.