Elisabeth Timmer ta logra tres record nacional na Amsterdam

ORANJESTAD (AAN): Durante e dos fin di simannan pasa, Elisabeth Timmer, atleta elite di Stingray Swimming Team y Aruba,

a protagonisa un fin di siman extraordinario durante e Nederlands Kampioenschap Sprint (NK Sprint) y e Speedo Fast Water Meet (SFWM), dos di e eventonan prestigioso di landamento na Hulanda, cu a celebra simultaneamente na Sloterparkbad na Amsterdam. 

E NK Sprint ta e campeonato nacional di sprint di Hulanda, dedica na e pruebanan cortico den piscina di 25 meter, mientras cu e Speedo Fast Water Meet ta complementa e evento cu distancia mas largo manera e 100 y 200 meter.  

Competiendo contra algun di e mihor sprinternan di Hulanda, Elisabeth a logra kibra tres Record Nacional di Aruba:

50m Freestyle (SCM) – 25.06

50m Butterfly (SCM) – 26.58

100m Butterfly (SCM) – 1:01.07

Loke tabata specialmente impresionante tabata su 25.06 den 50 meter freestyle y esaki ta sin cu el a drenta su fase di ‘taper’’. Elisabeth a keda solamente algun centesimonan di seconde pa kibra e barera di 25 seconde, un señal cu su mihor tempo  ainda ta pa bin.

E medayanan cu ta refleha disciplina

Ademas di e Recordnan Nacional, Elisabeth tambe a subi podium varios biaha. Na e Nederlands Kampioenschap Sprint, e a conquista un medaya di brons den 50m Butterfly, despues di establece e nobo record nacional.

Den e Speedo Fast Water Meet, Elisabeth a gana un otro medaya di brons den 100m Butterfly, confirmando cu e ta un di e mihornan  den e evento aki.

Como miembro di su ekipo di relay, Elisabeth tambe a contribui na dos medaya di oro y dos medaya di plata, añadiendo mas exito na un fin di siman cu ya tabata memorabel.

Stingray: Formando Atleta di Clase Mundial

Cada record, cada medaya y cada seconde cu Elisabeth ta baha ta confirma algo: Stingray Swimming Team ta formando pa hopi aña caba excelencia, cu ta un proceso, no un coincidencia.

Elisabeth su desempeño na Amsterdam ta resultado di añanan di dedicacion, disciplina y compromiso cu e deporte. Mas importante ainda, ta un inspiracion pa e siguiente generacion di landadornan Arubano cu ta soñando grandi. 

Elisabeth ta den ful preparacion pa CAC, cual pronto lo tuma lugar. Henter famia di Stingray Swimming Team ta sumamente orguyoso di bo.