Dos Atleta di Stingray Selecta pa representa Aruba na XXV Juegos Centroamericanos y del Caribe

E dianan aki na Santo Domingo 

ORANJESTAD (AAN): Stingray Swimming Aruba ta sinti un inmenso orguyo cu dos di su atletanan: Elisabeth Timmer y Ocean van Loon, ta forma parti di e ekipo di landamento pa representa Aruba na XXV Juegos Centroamericanos y del Caribe na Santo Domingo 2026.

   E Weganan Centro Americano y Caribense ta un di e eventonan deportivo mas prestigioso den nos region. Yega na e nivel aki ta resultado di añanan di disciplina, perseverancia, sacrificio y trabao duro.

   Dos landador cu meta defini:  Elisabeth Timmer,  como un di e landadornan femenino cu mas experiencia di Aruba, lo competi den: (*) 50m y 100m Free, (*) 50m y 100m Back, (*) 800m Free, (*) Relevo 4x100m Free, (*) Relevo 4x100m Medley, (*) Relevo 4x200m Free.

   Su prestacion ta refleha e añanan di prestacion consistente, e recordnan nacional y representacion distingui di Aruba riba nivel internacional.

   Ocean van Loon, un talento hoben cu ta sigui desaroya rapidamente, a clasifica pa: (*) 200m Individual Medley. (*) 50m, 100m y 200m Back. (*) 200m Butterfly.

   Pa Ocean, esaki lo ta su prome participacion na e Weganan CAC, un logro grandi den su carera deportivo.

   E seleccion di dos atleta di Stingray ta pone un biaha mas enfasis riba e compromiso di e club pa forma landador cu por competi cu e mihornan di Caribe y Centro America.

   Historia di Resultado: Stingray tambe ta forma parti di historia di landamento Arubiano. Na e Weganana CAC 2018, Mikel Schreuders, como miembro di  Stingray, a skirbi historia door di gana e prome medaya di plata den 100m Free y brons den 200m Free. Pues e prome medayanan di e disciplina di landamento pa Aruba na Weganan CAC. 

   Na 2023, Patrick Groters, landador elite di e club di Giants, a sigui e legado cu medaya di oro den 200m Backstroke y plata na 200m Individual Medley.

   Henter e famia grandi di Stingray Swimming Team ta desea Elisabeth y Ocean hopi exito, como tambe e otro landadornan cu ta representando Aruba. Stingray y henter Aruba lo ta hunto cu boso durante cada salida, cada buelta y cada meta.  Ban Stingray. Ban Aruba.