Ban Dal Bocht Bike Life a bautisa nan uniform nobo

ORANJESTAD (AAN): Den fin di siman, DIARIO tabata presente na Eagle Bowling Palace,

ora cu e grupo local conoci como ‘Ban Dal Bocht Bike Life’ a bautisa nan uniform mono.

   Alvin Brito, kende ta lider di ‘Ban Dal Bocht Bike Life’, a bisa cu e grupo ta consisti di 44 miembro, di cual tin 36 driver di motorcycle.  Den e team tin 8 dama cu ta coredor di brommer.

   E organizacion ta haci diferente actividad, e.o. Beach Tennis, tambe participa den 18 wega di Kickball.  Ta hunga futbol tambe.  Tin cu ta hunga softball.  Tres di e grupo ta participa den drag race.

   Anochi tabata anochi grandi cu a bautisa nan uniform nobo, cu ta un T-Shirt imprimi masha bunita.  Nan kier pa pueblo cera conoci cu Ban Dal Bocht Bike Life.

   Nan ta coredor di brommer pero alavez deportista.  Nan ta respeta tur automobilista, y ta percura pa comporta nan mes durante actividad y ora di bay cas tambe.

   Nan meta ta pa trece union den tur e motociclistanan na Aruba.  No ta importa si bo ta core e motorcycle di mas grandi of di mas speed, djis kier ta un grupo cu ta respeta tur ley.  Nan semper ta sigui tur ordo di Polis, y ta pidi tur miembro nobo pa no desvia y sigui riba e bon paso.

   Segun Brito, un di nan actividad grandi cu ta wordo planea, ta un evento pa asina recauda fondo cu ta bay pa e muchanan menos afortuna.