Despues di un exitoso inauguracion na Corsou:
ORANJESTAD (AAN) – Recientemente, IBiSA a yama un conferencia di prensa relaciona cu e Weganan Interinsular, den cual señor Isnardo Faro, director, a hiba palabra.
El a menciona cu un siman prome e weganan a cuminza cu e inauguracion na Corsou, cu a resulta exitosamente, y a duna di conoce cu e tres ministernan a sinta hunto y a acorda cu e aña aki atrobe lo tin e weganan interinsular entre Aruba, Bonaire y Corsou.
E prome fase di e deportenan cu a wordo hunga ta Aquathlon, futbol femenino, y schaak y IBiSA ta sumamente contento cu e resultadonan di Aruba, y a manda palabranan di pabien na e teamnan concerni, tanto a esnan cu a gana y esnan cu no, pasobra pa nan esaki por bira un experiencia positivo cu por yuda nan den futuro y den otro weganan.
Faro a anuncia e di dos fase di e weganan interinsular, cu lo tuma lugar e siman aki na Aruba, y e di tres fase cu ta e clausura lo ta na Bonaire.
E competencia na Aruba lo tuma lugar for di 27 pa 30 di Maart awo. E deportenan cu lo wordo hunga lo ta Dammen, Volleyball y Basket.
Señor Faro a comenta cu e preparacionnan no tabata facil. Pa organiza weganan grandi asina ta rekeri di hopi planeamento y a tuma nan lunanan di antemano pa sinta cu otro y yega na acuerdonan pa por realiza e weganan aki, exitosamente.
Director di IBiSA a expresa palabranan di danki pa tur nan partnernan: Gobierno di Aruba y Sport Subsidie Aruba, pasobra sin nan no por a haci esaki posibel. El a agrega cu e weganan aki ta rekeri di hopi inversion, y e muchanan sigur lo disfruta di e weganan aki.
Señor Faro a haci un invitacion general na pueblo di Aruba pa yega na e weganan y apoya nos teamnan.
