Will Erasmus, Hefe Deporte IBiSA:
- Basket y Volley ta na Centro Deportivo Betico Croes
- Competencia di Dam lo tuma lugar na Double Down
ORANJESTAD (AAN) Señor Will Erasmus, Hefe di Deporte na IBiSA (Instituto Biba Saludable y Activo), ken a expresa cu ta hopi remarcabel con e tres Isla ABC, ta trahando hunto den mesun direccion, pa por a organiza e weganan interinsular pa tres aña caba, y, hisando e nivel di organizacion.
Nan tin miembronan di stuur groep, project managers, y tur tin nan tarea y ta organiza esaki pa por haci e weganan posibel. Erasmus a expresa palabra di pabien na tur e personanan cu ta haci e weganan aki posibel.
El a sigui bisa cu Aruba tabata tin un tremendo participacion na Curacao, unda cu pa Aquathon Aruba a keda na prome lugar den e evento. Den futbol a obtene e di dos lugar, y tambe den Ahedrez e di dos lugar den e tablero di score aworaki.
El a yama pabien na tur e project, sport leidernan, cu a organiza e eventonan pa Aruba. Nan a training e muchanan durante henter e periodo di preparacion pa nan participacion aki na Curacao.
Esaki lo tuma lugar tambe pa e weganan na Aruba y na Bonaire. Sport leidernan ta den preparacion, ta entrenando e muchanan pa nan por tin un bon presentacion na Aruba y na Bonaire.
Erasmus tambe a gradici henter IBiSA cu ta den full preparacion, trahando henter e aña pero specificamente pa e fin di e siman aki, di 27 pa 30 di Maart cu e weganan interinsular lo ta tumando lugar na Aruba.
Diahuebs 27 IBiSA lo ta ricibiendo e delegacionnan na Aruba, unda cu riba e fecha aki, anochi, lo tin e apertura na double Down, y e weganan lo ta tumando lugar dia 28 y 29.
Dia 28 e weganan lo cuminza pa 9 or di mainta, despues tin un break merdia pa sigui 1 or traimerdia, atrobe. Pa esnan cu kier wak e weganan, Basket y Volleyball lo tuma lugar den Centro Deportivo Betico Croes, y e wega di Dam ta tuma lugar na Double Down. Dia 29 mes, anochi, despues di e competencianan tin e clausura cu lo tuma lugar na Double Down tambe, y esaki ta pa e invitadonan y atletanan cu lo ta compitiendo den e weganan aki. Estadia di e gruponan lo ta na Eagle Resort unda IBiSA lo ta ricibiendo tur e delegacionnan di Aruba, Bonaire y Curacao, y Aruba ta den preparacion pa cu esaki tambe, Will Erasmus a indica.
