Den wega di Domino tanten solo no baha, careda di bina no a caba

ORANJESTAD (AAN)-  Diasabra laat den anochi, habitantenan di Calabas a tende un zonido duro! Boedoem! Te hasta e conocido Dr. Phil di “de Vrije Savanne” a sali wak ta kico a pasa.

Un investigacion cortico e duna como resultado cu e conocido Snor Perez, lider di Team Snor, a keda malamente pega bou palo n’e unico y mundialmente famoso Domino Square Garden na Calabas.

   Materiaalwagen mester a bin yuda saca pober Snor, mal machica y mal gehurt. Su ego a haya un golpi, su formulanan di matematica den domino a “schiet tekort”. Un tal “Gibi”, lider di e Team Bou Palo, a mustr’e cu tanten Solo no baha, careda di bina no a caba!

   Den nan tremendo bataya diasabra ultimo 14 di augustus, cos tabata mustra “all sunshine” pa Team Snor, kende ta drenta half time cu bentaha di 11 - 9. Pero, Gibi, un guy cu experiencia den “coordinador medico”, a cuminsa duna su team vacuna contra stress y leu leu te hasta “mond-op-mond ademhaling” pa asina resusita nan “fighting spirit” y net den ultimo lap laga Snor keda pega bou dje palo cu score victorioso di 21-19!!

   Un hazaña sin igual cu sin dudad, segun rumornan, lo bay tin consecuencia pe trabuconan di Gibi, ya cu tin papia caba cu Team Pariba Legends – caminda Snor tambe ta forma parti di nan militancia – lo bin pa tuma revancha! Keda pendiente pasobra e cos aki a cuminsa stoba pisa den e domino square garden.