Den di dos siman di futbol di Division Honor tabata tin hopi gol

ORANJESTAD (AAN)- E siman dos di e torneo AVB a regala nos weganan cu hopi gol y futbol atractivo pero tambe weganan hopi fisico cu a bai foi man.

Esey ta futbol, e ta sigui ta un 'deporte di contacto' y cosnan sa pasa.

Ata ki nos resumen di e partidonan. 

Nacional vs RCA

 E dos equiponan aki ta representa e gran rivalidad di Aruba su futbol den e ultimo decada. Den e wega aki den siman 2, RCA y Nacional a bataya pa 90 minuut pero sin cu niun di dos oncena por a yega na anota un gol.

 Un partido duro y fuerte tacticamente entre dos ekipo cu conoce otro hopi bon, pero e partido no ta loke a spera di e dos clubnan aki y na final a keda den un "stalemate" cu e anotacion di 0-0.

 Un partido mas bien traba y cauteloso na mesun tempo, unda ambos ekipo a yega cerca pero sin anota gol. E ekiponan a parti punto, cada un cu 1 punto, y 'asina tambe keda cu 4 punto cada un riba tabla di clasificacion tras di La Fama.

 Nos "King of the Match" p'e wega aki ta comparti entre Mark Jacobs di RCA y Emerson Leocadio di Nacional. Nacional 0 - RCA 0

RCA lo enfrenta Britannia riba Diasabra 8 pm y Nacional lo enfrenta Dakota 6 pm riba e mesun dia.

Bubali vs Dakota

 Un partido unda Bubali a yega cu mas 'intencion' cu den e partido previo pa busca e tres puntonan y na cuminsamento di e partido a bai igual igual cu e "Amarillonan" apesar di menos posesion di bala. 

 Toch ta Dakota mes a habri marcacion na minuut 28 unda cu nan a toca bala hopi bon haciendo minimo 15 pase for di patras cuminsando cu Daryl Nelson y a termina cu Daniel Briceño combinando cu Fernando de Sousa den un 'un-dos', unda for di e ultimo pase e bala a cai net riba pia robes di De Sousa den area penal pa fusila portero Bernardo Maduro p'e 1-0, un bunita desempeño di ekipo.

 Na minuut 49 Deion Geerman ta conecta cu Fernando de Sousa unda e ta scapa bai den area penal pa hasi e wega 2-0 pa Dakota.

 Pero e partido no a sigui mucho facil pa Dakota for di e punto ey ya cu Bubali a cuminsa bataya mas duro y na minuut 65 Rensley Tromp cu tabatin un bon partido a hasi un pase largo riba cabes di Ruben Escalona cu ta anota asina e gol di corta bentaha, 1-2. 

Na final Dakota a logra wanta e resultado di 2-1 pa tres punto. Nos "King of the Match" ta Fernando de Sousa.

 Bubali 1 - Dakota 2

Bubali lo enfrenta Estrella sigientemente Diasabra awor 6pm y Dakota lo enfrenta Nacional Diadomingo 6pm. 

La Fama vs Estrella

 E dos ekiponan cu a causa sensacion e siman prome a topa otro den un partido hopi interesante atrobe.

 La Fama ta un ekipo efectivo, bon forma cu hungadonan di hopi experiencia, inteligencia, cu bon maneho di bala, apesar cu e velocidad no t'ey necesariamente, pero ken ta conta esey?

 Estrella, un ekipo hoben y cu hopi talento, no por a hunga na paar di La Fama pa mayoria di e wega, nan a wordo maneha pa gran parti, nos no a mira e "magia" cu e 'Naranhadanan' a mustra contra Dakota (den di dos tempo) e siman prome.

 Valdo Leocadio, miembro di e muraya berde den volante hunto cu Claudio Cavalcante y Jeyson Mundarain, ta habri marcacion pa La Fama na minuut 12 caba, pa asina dicta e ritmo di e partido aki.

 Na minuut 31, apesar di e dominio di La Fama, e goleador di e club di Santa Cruz, Trevor Faro, ta empata e wega pa Estrella, pero net tres minuut despues a toka turno na e goleador di La Fama, Jaydon Dania, pa aumenta bentaha di La Fama, 2-1.

 Na minuut 38 ta Jaydon Dania atrobe ta anota pa La Fama aumenta e score na 3-1, sigui pa su gol di penalty despues di halftime na minuut 53 pa hasi e wega 4-1 pa su "hattrick".

 Estrella a cuminsa reacciona toch, unda na minuut 61 Naibert Elizabeth ta anota e gol pa Estrella corta bentaha 2-4.

Ora cu nos a pensa cu un otro "comeback" di e santacruseronan a cuminsa, ta La Fama mes ta anota na 70, pa medio di Ocean Samson, pa hasi e wega 5-2 y ta Samson mes ta anota atrobe net 2 minuut despues pa hasi e wega 6-2.

 Estrella ainda no a baha cabes, purbando tur posibel, tiki laat, na minuut 90+2 unda Trevor Faro ta anota pa hasi e wega 3-6 y na minuut 90+4 Faro ta anota di punto penal pa su di dos hattrick consecutivo pa hasi e wega 4-6, un gran reaccion di Estrella pero sin suficiente tempo. 

Jaydon Dania ta e "King of the match". 

La Fama 6 - Estrella 4 

Siguientemente La Fama ta hunga contra Caravel Diadomingo 8pm y Estrella contra Bubali riba Diasabra pa 6pm.

 Britannia vs Caravel

 E ultimo partido di siman tabata entre Caravel y Britannia, dos ekipo cu ta busca pa sali for di bom di tabla.

 E Piratanan di Angochi ta un ekipo organisa, compacto y hopi fisico, no ta nada facil pa gananan, esey a keda demostra den e wega anterior contra Nacional. Britannia un ekipo cu ainda ta buscando nan "flow" despues di un bon Copa Betico unda nan tabata hopi bon te cu den kwart final, nan perde den semi-final contra La Fama.

 E partido a cuminsa cu hopi bon toke y velocidad di ambos banda y tabata promete hopi.

 Na minuut 17 e hoben delantero Wesley Illes ta manda Britannia ariba 1-0. Despues e accion nan a sigui basta balansa, tur dos ekipo hungando nan wega man'e a spera, pero cu un cierto tension.

 Na minuut 37 un incidente entre dos hungado, un hugada normal di foul a conduci na conducta violento unda cu referee ta parti cuater (4) carchi cora den un solo biaha.

 Apesar cu e arbitro a cumpli cu su deber, e wega a wordo afecta masha hopi mes den calidad y cantidad. E partido a sigui dilanti cu hopi espacio y desgaste fisico descumunal.

 Britannia a probecha di nan juventud y velocidad y na minuut 44 ta William Pardo a aumenta e bentaha di e Pumanan cu su gol net prome cu halftime.

 E partido mes a sigui bon sin mucho incidente mas, mi ta kere cu e hungadonan mes tabatin miedo di hunga cu menos hende ainda. En total a wordo otorga 4 carchi Cora y 4 carchi Geel den e wega.

 Den tempo adicional na minuut 90+5 Thionne Oduber a pone punto final n'e wega pa e victoria di Britannia. 

E "King of the Match" ta e hoben batayador y trahado di full cancha, Marcus Portier. 

Britannia 3 - Caravel 0

Resumen:www.futbolaruba.com