Coredornan di Aruba y di Curacao lo sigui awe cu competencianan di Karting

ORANJESTAD (AAN): E ambiente ta fenomenal!  Varios team di Curacao ta na Aruba pa competi den e torneo cu ta ser teni na Bushiri Karting Speedway.

  E prome competencianan a tuma lugar Diabierna merdia pa atardi.

   Algo great tabata e competencianan di Categoria Mini di mucha chikito.  Bo ta mira e dedicacion for di edad hoben caba di e muchanan aki cu sa con bon nan por domina e stuur riba e pista aki.

   Bo por mira e wowo di e adultonan, y e satisfaccion riba nan cara pa mira e muchanan core y pasa otro cu yen dedicarion riba e pista.

   DIARIO Deportivo a nota cu un di e categorianan cu a hala hopi atencion, tabata e “Categoria di Shifter”, cu ta e kartnan cu ta cambia speed.  Aki no ta core cu vehiculo cu transmission automatico, sino cu bo tin di cambia speed manualmente.  E Curasoleñonan ta yama esey “Categoria di Macho”.

   Bo por mira e ultimo dia di competencia awe Diasabra 9 di October 2021 na Bushiri Karting Speedway.  E competencianan ta for di 1:00 pm pa 5:00 pm y un total di 50 coredor ta busca chens di competi.  Di esaki, 21 coredor ta procedente di Curacao.

   Corda cu debi na e reglanan mas nobo di Decreto Ministerial pa cu e Ley di Calamidad, aworaki no por tin publico presente parti paden di e Speedway.  Pero bo por bay wak si, pero para pafo di cura di e pista, y bo por mira basta bon paden.