Accident chikito ora cu Tie-Rod Ends a kibra

ORANJESTAD (AAN): Diasabra anochi ariba e pista di International Raceway Park Palo Marga, na momento cu e categoria di King of the Street tabata tumando lugar,

e auto di Jr Madness Racing New India Assurance cu tras di stuur e conocido Jean Carlo Ras, a haye den un situacion poco fastioso.

   Esey ta net ora cu luz a bira berde na salida, por a wak con e wiel banda di pasahero a ‘drumi di banda’, indicando cu un piesa lo a kibra.  Pero esaki tabatin consecuencia cu e auto a bay den scual y casi a dal kibra den e cura di beton cu tin ambos banda di e pista.

   Ta danki na e reaccion rapido combina cu e añanan di experiencia di e driver, a logra di para e auto prome cu el a dal den e beton.

   A bin resulta cu tabata e tie rod ends a kibra, cu a causa e accidente chikito aki. E driver Jean Carlo a sali ileso y e daño na e auto ta minimo.