*Un gran amante di e deporte di Boxeo
ORANJESTAD (AAN): Aruba Boxing Commission (ABC) ta haci e anuncio cu profundo tristesa y respet tocante e fayecimento di Manuel da Silva, un berdadero amante, promotor y un pilar di boxeo amateur y profesional riba nos isla. E perdida di Manuel ta representa un bashi inpagabel pa e deporte di combate en general, y en particular esun di boxeo.
Manuel da Silva no solamente tabata un amante incondicional di e deporte di boxeo, sino tambe un bos masha reconoci riba e cuadrilatero. Manuel a sirbi cu distincion como Maestro di Ceremonia (MC) den diferente evento di boxeo, caminda el a hisa e energia y e ambiente di cada pelea. Su experencia y pasion a hib’e tambe pa ta un comentarista respeta di Boxeo, caminda su conocemento y entusiasmo pa e deporte a bria den kada transmision.
Manuel tambe tabata un miembro activo y vital di Racha di Boxeo, e unico organisacion promotor di boxeo na Aruba. Su dedicacion na e organisacion tabata fundamental pa impulsa e visibilidad y desaroyo di boxeo riba nos isla, creado oportunidad pa tanto boxdonan amateur como profesional.
"Aruba Boxing Commission lo sinti profundamente e ausencia di Manuel da Silva. E tabata un figura omnipresente y vibrante den e mundo di boxeo" a declara Gregory Oduber, representante di e ABC. "Su pasion pa boxeo tabata contagioso, y su trabou riba e ring a laga un marca imperecedero den nos comunidad."
Aruba Boxing Commission ta extende su mas sincero y profundo condolencia na e famia di Manuel da Silva, na su amistadnan y na tur e miembronan y directiva di Racha di Boxeo. Manuel su legado di compromiso y amor pa boxeo lo keda recorda y honra pa semper.
