Comite Olimpico Arubano a duna honor na Tita Iglesias pa su compromiso cu deporte

ORANJESTAD (AAN): Recientemente na oficina di Aruba Tourism Authority (ATA), Comite Olimpico Arubano (COA) a reuni cu Tita Iglesias,

cu te siman pasa tabata encarga cu e departamento di “Events and Sponsorships Specialists” di ATA. Awo despues di 41 aña den e sector Turistico y 9 aña cu ATA, Tita ta clausura su etapa profesional y yama bonbini na un capitulo nobo den su bida.

  Tita sigur ta un figura prominente den Aruba su comunidad, no solamente den e sector turistico, si no tambe den areanan cultural manera Carnaval, pero tambe den e mundo di Deporte. Sigur bon conoci pa su contribucionnan den diferente deporte y evento deportivonan internacional di deporte cu ta tuma luga na Aruba, Tita su rol den e colaboracion entre ATA y COA tabata instrumental den crea un relacion fuerte y di gran balor agrega. COA ta gradici Tita apoyo, amor y compromiso cu deporte.

   Manera a bisa durante e reunion, aunke Tita ta sigui pa e siguiente paso den bida, nan ta sigur cu e semper lo keda un gran parti di comunidad deportivo.