Como 23 futbolista selecta pa ‘Talent Development Scheme’ di AVB y FIFA

ORANJESTAD (AAN): Recientemente Minister di Deporte Endy Croes a acudi na lansamento di e proyecto ‘Talent Development Scheme’ (TDS) U12 di FIFA y AVB cu a tuma luga na Double Down.

   Un total di 23 atleta di 6 diferente club di futbol a keda selecta pa sigui e programa di desaroyo durante dos aña.

   Sr. Chris Beardsley, kende ta  FIFA Talent Coach ta encarga pa dirigi e programa. E programa aki ta yuda e hobennan mehora nan talento y tecnica den futbol, pero na mes momento educa nan riba un miho alimentacion.

   E dirigentenan di e 6 clubnan di futbol y e mayornan di e 23 atletanan selecta, tabata presente pa firma e contract cu AVB y FIFA. Tur 23 atleta a inscribi tambe pa e plataforma di enseñansa di EduCampus pa asina nan tin e flexibilidad pa entrena durante dia y sigui ful e programa di desaroyo pa dos aña largo.

   EduCampus ta un scol innovativo cu ta para pa un sistema educacional unda ta tene cuenta cu e necesidad di e mucha y/of hoben y ta brinda e hobennan oportunidad pa combina nan estudio y nan deporte faborito. Pa finalisa, Minister Endy Croes a indica cu esaki sigur ta un momento historico.

   Preparando pa prome biaha un seleccion pa competi den Concacaf  U14 aki dos aña. Minister Endy Croes ta gradici e mayornan cu a kere den esaki y permiti nan yiu forma parti di e proyecto aki. Alavez, ta gradici AVB, FIFA, EduCampus, Gobierno di Aruba y tur otro stakeholder cu a contribui den e proyecto aki. Hopi exito na e 23 atletanan.