Comite Olimpico Arubano a reuni cu atleta hoben Britta Schwengle di Aruba Aquatics Federation

Preparando pa un Ciclo Olimpico grandi su dilanti

ORANJESTAD (AAN):  Siman pasa den sala di Comite Olimpico Arubano, a reuni cu atleta Britta Schwengle, cu sigur ta un atleta conoci localmente, pa su logronan durante e ultimo Ciclo Olimpico, como e atleta cu a participa na e mayor cantidad di eventonan manera e Caribbean Games, Weganan CAC SanSalvador2023 y Weganan Panamericano Santiago 2023.

            Ademas di esaki, a logra gana 3 medaya den e proceso di su participacion, den natacion y natacion “open water”.

            Durante e reunion aki, a evalua su rendimento durante e ultimo Ciclo Olimpico, ademas di a papia riba e planes cu tin pa e siguiente aña, unda e proceso ta cuminsa di nobo cu e prome weganan cu lo ta Weganan Panamericano Junior ASU2025.

            Britta a gradici su federacion Aruba Aquatics Federation pa e apoyo continuo di su proceso, hunto cu su entrenadornan local Tyrine de Kort y Ismael Santiesteban.

            Banda di esaki tambe el a splica cu e ta contento cu e proceso deportivo cu e ta canando na “University of North Carolina at Pembroke”.

            Finalmente e la gradici COA y su mayornan cu semper ta su tras y aportando na su desaroyo.