Comite Olimpico Arubano a reuni cu atleta di Natacion Artistico Kyra Hoevertsz

*Kyra lo participa na varios “World Cup”

ORANJESTAD (AAN):  Cu e cambio di aña tras di lomba y e evaluacion di e Ciclo Olimpico anterior cla, a cambia e enfoke y a cuminsa prepara tur cos cu bista riba futuro y mas en particular aña 2025. Den cuadro di esaki a sinta cu atleta elite Kyra Hoevertsz, cu den e Ciclo di Paris2024, a logra hopi bon resultado no solamente pa COA cu su duet partner y e team na Weganan Centro Americano y del Caribe, pero tambe durante su participacion na diferente World Cups unda e la termina cu su miho prestacion como atleta "solo", unda e la logra un di 7 luga den e rutina "free".

            Durante e reunion aki, a mira kico ta e plan pa cu entrenamento y competencianan durante aña 2025, ademas di a combersa un poco riba e plannan pa futuro. E aspecto di “Long Term Athlete Development” ta uno importante, especialmente den e caso cu un atleta manera Kyra, cu tin varios Ciclo Olimpico tras di lomba como atleta, y awor ta un dama hoben profesional cu mas ambicion den bida, y con esaki ta forma parti di su bida como atleta.

            Kyra lo participa na varios “World Cup” durante e prome mitad di aña como atleta “solo”, y den proceso sigui prepara pa tur locual futuro por trece pe.