Comision Anti-Doping a tene un anochi di informacion

ORANJESTAD (AAN): Dialuna anochi e Comision Anti-Doping a tene un anochi di informacion pa e delegacion di Aruba cu lo ta biahando proximamente pa e Weganan Sur Americano di Hubentud Rosario 2022.

            Presidente di e Comision Anti Doping, Sr. Patrick Werleman a habri e anochi, elaborando riba e topico di Prevention and Manipulation pa despues sigi riba e topico di doping.

            E topico di Prevention and Manipulation ta un topico cu a bira grandi ultimo temponan nan aki caminda cu mas y mas tin manipulation di atletanan y tambe di e deportenan. Patrick a splica kiko tur por pasa si e atletanan wordo gara ta manipula den nan deporte. Despues di esey a continua riba e parti di doping mes caminda a splica kiko tur ta e consecuencianan cu tin si un atleta wordo gara cu un substancia prohibi. Un otro topico tabata e Whereabouts cu ta un aspecto obligatorio cu tur atleta mester tene nan mes na dje, e ta un obligacion pa mantene tur cos actualisa. Esaki sigur pa e atletanan hoben ta algo cu lo mester bai custuma cun’e.

            Angelique Koolman a elabora riba e control di dopahe y a splica con e proceso di dopahe ta tuma lugar ora controla esaki. Na mes momento a duna un demostracion con un doping controle lo mester tuma lugar. Na final Patrick Werleman a duna informacion di e link nan importante pa e atletanan haya sa mas riba e topico anti doping.

            E Weganan Sur Americano di Hubentud Rosario 2022 lo tuma lugar for di dia 28 di April pa 8 di Mei 2022 y TeamAruba tambe lo tey presente na e gran evento aki.