Cecilia A. Balentin a haya reconocemento como Baluarte Deportivo 2021

Premio Excelencia den Deporte

ORANJESTAD (AAN): Un otro persona cu a ricibi e reconocemento di Baluarte Deportivo pa Premio Excelencia den Deporte ta sra. Cecilia Balentin di Scherm Amateur Bond.

Desde aña 2007 pa 2022 sra. Balentin tabata responsabel pa organisa e campeonatonan di full aña pa e atletanan di esgrima na Aruba. Como tambe sra. Balentin a organisa e demostracionnan di e deporte di esgrima na scolnan basico di Aruba, IBiSA San Nicolas y Centro Deportivo Betico Croes cu e meta di promove e deporte di esgrima y tambe recluta deportistanan nobo.

Sra. Cecilia a fungi como entrenado di esgrima, unda a yuda train e muchanan, guia y siña nan e miho manera pa domina e deporte di esgrima. Y ta percura pa e administracion completo di Scherm Amateur Bond Aruba y prepara e documentonan necesario ora e atletanan tin cu biaha pa competi den exterior.

2014 Youth and Veterans Pan American Championships

Como parti di e directiva di Scherm Amateur Bond Aruba, sra. Balentin a yuda den e organisacion y tabata un piesa clave pa cu e realisacion di e campeonato Pan Americano Hubenil y Veterano 2014 na Aruba.

Premio Excelencia den Deporte y Minister Endy Croes ta felicita sra Cecilia Balentin cu reconocemento Baluarte Deportivo 2021 danki pe dedicacion amor y aporte den e deporte di esgrima.