ORANJESTAD (AAN): E promer siman di september tur e deportenan cu ta participa den Jani Brokke Memorial ta inicia.
Manera tur aña Directiva di Fundacion Movemiento ta Bida (FMTB) ta organisa e torneo deportivo pa tur esnan cu tin 60 aña of mas. E aña aki FMTB a haya ayudo financiero di parti CEDE Aruba y Lotto pa Deporte. Na e manera aki e 60 plusnan por tin un evento deportivo grandi atrobe despues di 2 aña sin por a organisa esaki.
Un total di ocho ramo di deporte lo worde practica durante e dianan ey y entregamento di premio e aña aki lo ta diasabra 24 di september durante un anochi ameno di 8 pm pa 12 am unda tur hende por los pia cu bon musica manera semper di Nos Cu Nos. Esaki lo tuma lugar na Centro di Bario Dakota.
Softbal ta Diadomingo 4 di september ariba e tereno di Sabana Grandi y mescos cu anjanan anterior lo tin bataya fuerte entre e teamnan partisipante cu ta Jani’s, Boomerang, Glovers, Aruba Jrs, Surprise, J.T Tigers, Astros y Bambino. Weganan ta cuminsa pa 9.30 or di mainta. No perde ningun.
Volleyball ainda tin lugar pa tur esnan cu kier hunga cu of sin team. Volleyball lo worde hunga den Sporthal na Colegio Arubano na Oranjestad diabierna 9 di september pa 7 or di anochi.Tuma contacto cu Rudy Leysner na tel: 5942546.
Futbol e aña aki ta ariba cancha di RCA y ta tuma lugar dianan 1 y 2 di september cuminsando pa 7 or di anochi. Un y tur por bin apoya e gran hungadornan di nos futbol di antes hungando wandelvoetbal y presencia nan movementonan special cu ainda nan tin. Entrada ta gratis naturalmente. Freddy Rafini ta encarga cu esaki y si abo kier partisipa djies jama Freddy na tel 5949994.
E aña aki Biljard lo worde hunga na Fermin’s Bar na Noord dianan 3, 10 y 17 di september cuminsando pa 2 or di merdia. Si abo tambe kier partisipa ainda cu biljard anto yama Moonchi Kelly na tel 5938954. No tarda pasobra tin un maximo na hungadornan cu por participa.
Pa bowling manera tur anja Edna Maduro lo bai organisa esaki y lo worde hunga ariba canchanan di Eagle Bowling. E weganan lo tuma lugar dianan 2 y 4 di september cuminsando 5 or di atardi .Si abo kier purba bo suerte cu e cabayeronan y damanan 60 plus den bowling anto yama Edna na tel 5942433
Domino ta completamente yen caba ja cu Roy Sneek for di maart caba a cuminsa prepara su schedule cu e anja aki atrobe lo ta na Centro di Bario Noord. Dia 31 di augustus e reunion di domino na Centro di Bario Noord a tuma lugar pa 7.30 anochi.
Roy ta puntra tur hungador pa ta presente 30 minuut promer cu wega y tene cuenta co lo worde hunga dianan 9 y 11 di september. Pa mas informacion tocante e diferente weganan por yama oficina di FMTB na tel: 5868651.
Tennis e aña aki lo tuma lugar ariba e canchanan di Aruba Racquet Club entre 14 y 23 di september cuminsanda pa 7’or di anochi. Esnan cu kier partisipa por tuma contacto cu Johny Goitia na tel 7317211 of pasa serca dje na canchanan di Aruba Racquet Club. E aña aki lo hunga 80 plus den Doubles y tanto Damas y Caballeros por participa. Bo no mester tin partner ya cu Johny mes ta traha tur e teamnan.
Canamento lo ta den Franse Pas e aña aki y lo ta diadomingo 18 di september cuminsando mainta pa 6.30. Tur hende por participa y e lo dura ongeveer un ora den e dushi aire fesco di nos naturalesa.
Inscripcion por haci na oficina di FMTB pero lo no acepta mas cu 100 persona.
Directiva di Fundacion Movemento ta Bida kier a gradici e aña aki atrobe tur esnan cu ta yuda nan gratuitamente pa organisa e torneo grandi aki cu ta esun di mas grandi na Aruba.
Tambe un danki grandi ta bai pa CEDE Aruba y Lotto pa Deporte pa nan ayudo financiero pa asina nos grandinan por tin nan evento deportivo di tur aña.
Tur hende ta worde invita di awor caba pa bin presencia y apoya nos 60 plusnan den accion.
