Caredanan di ‘La Leyenda del Dorado Aruba’ tabata un gran exito

Careda di Mountain Biking

ORANJESTAD (AAN): Fin di siman pasa a tuma luga e prome edicion di La Leyenda del Dorado Aruba, organiza pa Caribbean Trail Legends Foundation, na Sarah Quita Beach, mihor conoci como Fisherman’s Huts.

   E evento aki ta marca un momento historico pa ciclismo di montaña na Aruba, cu un total di 72 participante, di cual mas cu 90% tabata participante internacional, proveniente di paisnan y destinonan manera Alemania, Argentina, Chile, Belgica, Mexico, Merca, Colombia, Venezuela, Hulanda, Bonaire y Corsou, entre otro.

   Durante tres dia di competencia intenso, e ciclistanan a haya e oportunidad pa descubri e bunita seronan di Aruba y enfrenta un reto deportivo unico. Den total, nan a completa mas cu 139 kilometro y mas cu 1.700 metro di desnivel positivo durante un periodo di 3 dia. Un logro extraordinario cu ta pone Aruba riba e mapa internacional di mountain biking.

   Un colaboracion internacional cu ta pone Aruba riba mapa: La Leyenda del Dorado Aruba ta resultado di un colaboracion entre Caribbean Trail Legends Foundation y La Leyenda Colombia. Despues di e experiencia deportivo na Colombia y Punta Cana, awor a yega turno di Aruba pa fungi como anfitrion di e evento extraordinario aki.

   La Leyenda ta un di e eventonan di ciclismo di montaña mas grandi den e region di Latinoamerica, reuniendo ciclistanan profesional di alto nivel y competidornan di diferente parti di mundo.

Pa nos, como isla, ta un gran honor y motivo di orguyo pa por recibi un evento di e magnitud aki riba nos dushi Aruba. E colaboracion aki no solamente ta fortalece e posicion di Aruba como destino deportivo internacional, sino tambe ta mustra e potencial enorme cu nos tin pa sigui desaroya ciclismo di montaña y turismo deportivo den nos region.

   Segun Rowald Werleman, Relacionista Publico di La Leyenda, ta un privilegio pa por forma parti di e iniciativa aki y contribui na e crecemento di un evento cu ta conecta deportistanan, destinonan y comunidadnan internacional.  Ata aki e resultado oficial pa categoria:

(**) Female – General Classification
Michelle Zacht (Hulanda)
Loren Muffat (Aruba)
Maria Quevedo (Argentina)

(**) Male Open
Russon Gonzalez (Aruba)
Louis Mine (Bonaire)
Anton Erasmus (Aruba)

(**) Male 30+
Marcelo Gutierrez (Colombia)
Paul Cremers (Aruba)
Jonathan Padilla (Aruba)

(**) Male 40+
Karl Platt (Alemania)
Luis Enrique Garcia (Colombia)
Ryan Rasta Lacle (Aruba)

(**) Male 50+
Marcelo Aiello (Argentina)
Hans Plackeart (Belgica)
Jean Hoek (Aruba)

(**) Male 60+
Gert Van Vliet (Aruba)
Jose Luis Minena (Argentina)
Arturo Mendez (Mexico)

   E edicion aki tambe a conta cu presencia di un juez internacional invita como official di UCI (Union Cycliste Internationale), e organizacion mundial responsabel pa regula ciclismo competitivo internacional y su campeonato mundial.

   Danki na tur hende cu a haci esaki posibel! Caribbean Trail Legends Foundation kier expresa su mas profundo agradecemento na tur e patrocinadornan y partner cu a contribui pa haci e evento aki realidad. Un danki special tambe na e 55 voluntario, cu nan dedicacion, compromiso y profesionalismo a contribui na e realizacion di un evento di nivel internacional.

E exito di e prome edicion di La Leyenda del Dorado Aruba ta un logro pa nos comunidad, pa nos deportistanan y pa Aruba como destino internacional di deporte.  Esaki ta djis e comienso.