Bululu y mas casi na final di un fabuloso wega di futbol

ORANJESTAD (AAN): Dialuna anochi den Stadion Guillermo Trinidad na Dakota, tabatin e wega prepara pa final di Campeonato di Futbol pa Division U17 di Futbol.  E dos teamnan cu a yega final ta RCA U17 vs. Santa Fe U17.

   Fanaticonan pa ambos team a ocupa e tribunanan chikito banda pariba.  Despues di Himno di Aruba, e wega a start cu ambos banda buscando forma pa yega dilanti pa anota goal.  Di comienzo por nota cu ta e dos mihor teamnan ta riba veld y ambos cu mesun forza tabata domina bala, cu varios tiro riba goal.

   Wega di U17 ta dura 80 minuut.  E prome mitar a drenta y ningun team a anota goal.  Ta parce cu e pep-talk a yuda un poco, como cu e di dos mitar por a mira cu tur dos banda ta ancioso pa anota goal.

   E prome goal a cay na di 65 minuut, ora cu RCA a manda un free kick den direccion di goal, y aunke defensa di Santa Fe a trata na evita esey, e bala a lora y drenta den goal.  Asina RCA a bay dilanti cu score di 1-0.

   Ni 4 minuut despues, un fayo a wordo cometi den area penal, y aki RCA a ricibi un penalty.  Na di 70 minuut di wega, RCA a cobra e penalty pa asina e wega a bira 2-0.

   Den menos di 30 seconde cu e goal aki a drenta, mientras cu e resto di RCA ta celebrando e anotacion, diripiente a mira con hungadornan di Santa Fe a core bay riba un solo hungador di RCA cu tabata canando ainda cerca di goal.

   Esey ta momento cu e otro hungadornan a move pa check kico ta pasando, y pushamento a cuminza y golpi a cuminza cay.  Referee a cuminza calma nan, y dirigentenan di ambos team tambe a subi veld pa stop e hungadornan di sigui cu e bululu, y na prome instante tabata parce cu nan ta logrando.

   Pero e ora ey, algun hoben for di tribuna a bula e cura, y subi veld y nan tambe a cuminza parti golpi.  Eynan si ya e dirigentenan di ambos team ni referee no por haci nada mas.  For di publico tabata tira obheto riba veld, y a mira por lo menos un miembro di fanatico cu a subi veld cu un arma blanco.  Tambe a mira un hungador di Santa Fe cu a gara e palo di bandera di Corner y kier a bay ataca hende cune, pero fanaticonan a convence pa deshaci di e idea y el a cumpli tambe.

   Varios hungador a haya golpi, y yamadanan a drenta na Polis cu mesora a dirigi patruya eynan.  Na yegada, e unidadnan a pidi pa refuerzo, y e ora unidadnan a bin for di diferente distrito pa duna un man.  Un unidad di Ambulans tambe a yega pa duna tratamento na un persona cu a haya golpi na su pols.

   WEGA POSPONI:  Dirigentenan di AVB a tuma decision cu e wega ta wordo posponi na di 70 minuut.  Pues faltando solamente 10 minuut mas pa wega a finaliza.  Un representante a bisa DIARIO cu nan lo bay warda e rapport di e Match Coordinator, y tambe rapport di Cuerpo di Referee riba loke a socede, pa asina dicidi kico ta bay haci.  Sea ta declara RCA victorioso cu e score di 2-0 den 70 minuut di wega, of lo mas extremo, ta pone nan hunga di nobo pero cu stadion sin publico.  Pero ta parce cu esey lo no ta e caso como cu e wega a wordo hunga como 87% caba.

   Na final, Polis mester a para pafo pa asina sigura cu e hungadornan di RCA por a sali bay nan cas sin wordo ataca mas.