Brazilian Flash a tene un minuut di silencio durante evento

ORANJESTAD (AAN): Den fin di siman a tuma lugar e evento di Caribbean Shootout 2024: Mega Jet Car Invasion na Pista di Palo Marga.

  Esaki a wordo organiza door di Brazilian Flash Racing Foundation, relaciona cu e hecho cu nan ta observando nan di 35 aniversario di existencia.

   Prome cu competencia, e organizador Brazilian Flash a  tene 1 minuut di silencio na honor di Freddy Ras, kende ta e crew chief cu a sufri accident fatal siman pasa den Pit Area di e pista.

   Durante di e minuut di silencio, por a sinti un tristeza enorme cereca tur hende.  Emocion tabata fuerte, y famia di Freddy tabata presente y asina a duna palabra di aprecio pa tur esnan cu tabata na Palo Marga, cu a duna nan tanto condolencia, como na e famia y duna honor na e momento dificil aki, cu despedida di Freddy Ras.

   Entiero di Freddy Ras lo tuma lugar awe Diaranson di 2:00 pm pa 4:00 pm na Ad Patres Funeral Home na San Nicolas.  Despues acto di cremacion lo tuma lugar den seno familiar.