Actividad posiblemente lo bira careda anual
- Evento di Brazillian Flash a ricibi bon comentario tur caminda
- A firma deal pa cubri mantenimento pa 5 aña di Palo Marga
ORANJESTAD (AAN): Un publico hopi grandi, tabata testigo e fin di siman tras di lomba, di e tremendo caredanan di Drag Race cu a tuma lugar ariba International Raceway Park Palo Marga, cu un pista completamente renoba y awor traha special pa careda.
E actividad tabata “Caribbean Shootout 2024: Mega Jet Car Invasion”, organiza pa Brazillian Flash Racing Foundation cu asina ta observa nan di 35 aña di existencia, y meti grandemente den promocion di deporte di motor riba e isla.
Pista di Palo Marga awor tin asfalt special rekeri pa caredanan di auto y motorcycle. Tambe awor tin 26 palo di luz cu iluminacion cla.
Tabatin presentacion di coredornan di hermana isla di Curaçao, Puerto Rico y sin laga afo e show grandi di e Jet Car. Na mes un momento tabata testigo di e firmamento entre Minister Endy Croes, Lotto pa deporte Aruba y Aruba Bond van Motorsport (ABM) cu asina ta sigui promove e deporte cu hopi Arubiano keto bay ta stima asina hopi. Ta bin cu un plan di mantenimento pa 5 aña, ta duna 60 mil Florin anual (total di 300.000 Florin), pa keda mantene e pista y e lugar. Gobierno ta sigui inverti pa kizas construi un toren nobo na otro banda di pista, na aña 2025.
E firmamento ta indica cu e mantenimento lo bay mantene e pista, e tereno, y tur instalacion di luz keda up-to-date.
Tito Tromp di Brazillian Flash a keda hopi satisfecho cu e exito di e evento aki. Contento di mira tribuna yen y cu tur driver tabata bon anima pa e competencianan. El a duna un indicacion cu nan lo por pensa pa haci e Caribbean Shootout aki bira un actividad cu lo ripiti cada aña. Aki e ta mira cu si e cooperacion di tur stakeholder sigui mescos, nan por haci algo similar pa 2025, y 2026 tambe, y sigui bay dilanti asina.
