Braves a gana Brazil Hawks 15-1

ORANJESTAD(AAN): Temporada nobo di baseball Double-A ta den full swing y Diadomingo den Joe Laveist Ballpark Braves a logra gana Brazil Hawks 15-1.

Braves a bati un total di 13 hit, mientras cu Hawks a logra apenas 4.

E 5 errornan cometi pa Hawks sigur a causa algun problema pa e equipo, pero e bateo potente di Braves hunto cu e picheo fuerte tabata determinante.

Pitcher ganador tabata Alexander Rodriguez kende a permiti 4 hit, 1 base por bola y 1 careda, mientras cu el a poncha 4 bateador.

Pitcher perdedor tabata Zefrinthian Kerr, kende apesar di permiti 9 careda y 9 hit, a logra 7 ponche contra Braves.

Mihor bateadornan pa Hawks tabata  Juan Carlos Wester 2-1, Jonairo Isaias Quand 2-1, Jordan Pimienta 3-1 y Brandon Kerr 3-1.

Mihor bateadornan pa Braves tabata Angelo Webb 3-2, Moises Castillo 5-3, Daniree Tromp 5-3, Leander Angela 5-2, Samir Webb 2-1 y Ralph Dinzey 2-1.