Aruba Growth Fund ‘On The Run’ participando den KLM Aruba Marathon 2022

ORANJESTAD (AAN): E tabata un fin di siman di hopi fitness riba cayanan di Aruba! 

DIARIO a keda fascina pa mira asina hopi conocido trahador di companianan local participando den e Marathon, den e Half Marathon, den e 10K y tambe den e 5K.

   The Purple Squad, apoya pa Aruba Growth Fund, ta un di e gruponan di mas grandi cu a participa den e evento cu a ser teni tanto Diasabra atardi, como tambe Diadomingo mainta trempan.  E evento a start y finish na Hilton Aruba Caribbean Resort & Casino, contando cu mas o menos 200 participante.

   E grupo ta consisti di coleganan cu ta cana y core, participando den tur categoria, orguyosamente representando Hilton Aruba Caribbean Resort & Casino, the Casino Aruba na Hilton, Botica di Servicio, Laboratorio di Servicio, OP=OP, Budget Rent a Car, Avis Rent a Car, Payless Car Rental y Kosmetikos.

   The Aruba Growth Fund a worde estableci riba e isla na 2012 y ta e prome fondo priva Arubiano cual a ricibi su fondo inicial for di e Aruban Pension funds principal. E dinamico Aruba Growth Fund ta pertenece na 20 mil Arubiano. Cu e iniciativa anual aki, y slogan ‘On The Run’, e fondo tin e meta pa promove un estilo di bida saludabel pa su miembronan di team.

   Den e imagen por mira participantenan na comienso y final di e careda, disfrutando di un ambiente unico di e evento deportivo aki, y coredonan y joggers di diferente parti di mundo, contento pa ta hunto atrobe despues di un pausa di dos aña.

   Na 2019, KLM Aruba Marathon a firma un acuerdo di tres aña cu Hilton Aruba Caribbean Resort & Casino y Casino cu e Run in The Sun Foundation, encarga cu e organizacion. The Run ta nombra riba e World Marathon Calendar, y segun organizado Kees van Muiswinkel, Chairman & Founder di Sun Foundation/KLM Aruba Marathon, e ta atraendo un gran cantidad di bishitantenan internacional, como tambe turistanan cu ta bin pa vacacion y localnan.