Braves a bay ariba 2-1 den playoffs di Double-A

ORANJESTAD(AAN): Diaranzon anochi e serie di playoffs di Double-A entre Red Machine y Braves

a sigui y tabata un tremendo wega cu a deleita e publico presente y esnan cu a sigui tur cos via Guia Deportivo.

For di comienzo te final tabata un wega preta y na final Braves a logra un victoria di 4-3.

Despues cu Michell Alvarez a haci un tremendo trabao riba monticulo pa Braves, Daniree Tromp a tira resto di e wega pa haya e triunfo riba su nomber y mas importante pa Braves bay ariba 2-1 den e serie di best of five.

Awenochi e di 4 wega ta tuma lugar y si Braves gana nan lo pasa pa final contra Atco Indians.

Braves tabata tin 4 careda, 13 hit y 1 error y Red Machine a caba cu 3 careda, 5 hit y 2 error.

Pitcher perdedor tabata Alexander Arias, mientras cu e mihor bateadornan pa Red Machine tabata Djurwin Croes 2-1, Mac Aimsy Louis 3-1 y Filbert Thiel 3-1.

Pa Braves e mihor bateadornan tabata Daniree Tromp 4-2, Jomark Flanegin 4-2, Lendle Dirksz 4-2 y Albert Croes 5-2.