Atletanan di pesas for di Ecuador a bin prepara na Aruba

ORANJESTAD (AAN) -- Federacion Ecuatoriana de Levantamiento de Pesas a manda algún top atleta pa bin prepara na Aruba, for di 11 maart pa 11 mei 2022.

            Entre e atletanan a bin e campeon di Weganan Olimpico di Tokio Neisi Dajomes cu a gana medaya di Oro pa su país Ecuador. E atleta aki a sa di gana varios titulo manera campeon Mundial, Panamericano y Suramericano. El a yega di bin varios biaha Aruba pa su preparación riba nos isla.

            Hunto cune a bin Angie Palacios Dajomes cu den pasado tambe a gana titulo mundial den Youth. Campeon Suramericano y Ibero Americano, na Weganan di Tokio a salina di 6 lugar.

            Dos atletanan cu tambe a viaja cu e delegación ta German Dajomes y Jessica Palacios un atleta femenino hubenil di 16 aña a cu ta preparando pa bay competi den e Weganan Hubenil di Rosario na Argentina for di 28 april pa 8 mei 2022.

            Tur e atletanan aki ta train hunto cu nos atletanan local den Compleho Deportivo Frans Figaroa na Noord. Tur e atletanan aki ta wordo guía door di entrenador internacional Walter Llerena y tambe a biaha cu e delegación e masajista Daniel Giltrigos for di Colombia.

            Esnan cu kier pasa  wak training of kier train hunto cu e top atletanan por pasa na Compleho Deportivo Frans Figaroa.

            Aruba Amateur Weightlifting Association kier a manda palabra di gradicimento na Federacion Ecuatoriana de Levantamiento de Pesas cu a scoge Aruba como nan base di entrenamiento