Atletanan di Aruba ta conta di nan experiencia na Weganan Panamericano Junior

ORANJESTAD (AAN):  Atletanan Inald Fernandes Perna di 18 aña, y Ocean van Loon di 16 aña di landamento,

ta dos hoben cu a competi pa prome biaha na un weganan multideportivo den e ciclo Olimpico cu den e caso ta e Panamericano Junior ASU2025 na Paraguay.

   Ambos ta expresa con esaki ta un oportunidad unico pa nan y ta conta mas di nan experiencia aki na Asuncion, Paraguay.

   Inald Fernandes Perna a declara cu e experiencia tabata “unico”, y orguyoso di por a participa den su prome Weganan Panamericano Junior, y di por a representa Aruba na e competencia aki.

   Encuanto su caredanan den landamento, el a bisa cu el “a bay OK y semper tin cosnan cu e mester drecha ainda”.  Pues e ta ancioso si por bay pa e siguiente Weganan internacional aki, y presta mihor, “y duna mi tur”.

   Di su banda, e atleta Ocean van Loon a bisa cu su caredanan a bay basta bon, el a sinti su mes bon den awa, y caredanan a move rapido.  E ta haya e participacion na ASU2025 como un experiencia fabuloso.

   E ta admiti cu tabatin hopi bon atleta pa competi contra nan, y esey a haci e reto mas interesante.  Contento di ta na Paraguay hunto cu su amigonan atleta.  El a bisa cu semper e ta motiva pa sigui bay dilanti.