Aruba su teamnan U15 mucha homber y U14 mucha muher ta den final di CFU Challenge Series mañan

ORANJESTAD (AAN)- Aruba prepara pa apoya e campeonnan. E seleccion nan Girls U14 y Boys U15 ta invicto den e torneo CFU Challenge Series na Santo Domingo.

Algo cu sigur mester ta orguyoso di dje. Masha aña no a haya un resultado asina aki den e futbol hubenil. Segun Seever Krozendijk kende a haya e oportunidad pa cubri e magno evento pa Aruba, “ E torneo CFU Challenge Series ya ta uno exitoso pa nos futbol, y despues nos mester sigui traha cu nan. Es mas Aruba su seleccionnan Boys and Girls ta ser usa como ehempel pa Caribbean Football Union pa loke ta disciplina y comportacion. Nan conducta ta strak y bon y esaki no por otro mirando henter e staf cu ta aki cu tur dia ta tene session riba e tema encuestion cu e hungadornan.

Aruba su futbol hubenil ta den nubia na Republica Dominicana, nos delegacion ta bibando momentonan unico. E motibo pakico nos ta bisa esaki ta pasobra no solamente nos mucha muher y homber nan ta hayando e elogio for di tur skina pa e bon futbol desplega pero tambe ta gana e respet pa nan disciplina y comportacion y usa como ehempel pa e dirigentenan di CFU na ambos lugar di hospedahe. Manera e dirigente a bisa den un entrevista realisa “Boso muchanan ta hopi disciplina, un bon ehempel pa otronan”. Claro esaki ta un pluimje cu nos mester ta orguyoso di dje.

Awor cu nos seleccion femenino U14 diadomingo awor den e gran final di e Caribbean Football Union Challenge Series 2021 ta un muestra cu e torneo ta uno exitoso. Nunca antes un seleccion femenino U14 di futbol a yega di representa Aruba den un torneo internacional. E damitanan mester a hunga nan ultimo wega di grupo diabierna contra Turks and Caicos, un rival cu probablemente Aruba lo topa diadomingo awor den e gran final.. E seleccion entrena pa coach Milly Henriquez y su staf tecnico a gana e curason di hopi hende na Republica Dominicana, tur tabata tin palabranan elocuente pa nos mucha muhernan. E spirito y animo di nos seleccion femenino ta super halto, cada un ta determina y nos sigur ta biba esaki di cerca tur dia.

Di otro banda e seleccion Boys U15(torneo mester a tuma lugar aña pasa 2020, pues e muchanan ta un aña mas grandi) a hunga nan wega semi-final contra US Virgen Islands y a gana cu e score abrumador di 9 pa 0.  Pues Aruba ta den dos final aki na Republica Dominicana.

Mientras cu e team di mucha muher U14 mester a hunga ayeratardi pa 6’or contra Turks and Caicos Island, pero ya caba por bisa cu e team aki ta den final pasobra nan ta invicto den e campeonato aki.”

Un pabien na e hungadornan Josthan Maduro, Kyri de Weever, Websther Merveille, Jodrick de May, Tion Martina, Edhyon Hersilla, Diego Croes, Reangelo Boekhoudt, Marlison Hooi, Juan Luis Delgado, Edward Munro, Jeshua Ventura, Edgar Mendez, Jeremiah Tjin, Jayden Werleman, Zeshawn Supriana, Steven Jie-A-Swie y Brandon Angela Y e Staf Boys U15 consisti di Steve, Glenn, David, Aron, Jomar y Ricardo.

Un pabien na e hungadornan Andreina Cuevas, Alysa Bernabela, Bindiya Wadhwani, Ceci-ann Morillo, Ellen de Jong, Genesis Hazel, Jaelynne Vrolijk, Joya Tromp, Kim Schoppema, Layevska Farro, Loredana Nepi, Michaela Netto, Rachelle Sofia Mora Hernandez, Richdienne Croes, Sharrienne Vrolijk, Sundari van der Linden, Tamika Almary, Wendylaine Angela Y e Staf Girls U14 consisti di Dyane, Milly, Joally, Lyxienne, Jimena y Luz. Tambe sigur na e Hefe di delegacion Mildred cu ta percurando pa e parti logistica.

E weganan pa e gran final lo ta Diadomingo awor pa 11.30 di e mucha muhernan y 1.30 di e mucha hombernan. For di awor caba DIARIO ta desea hopi exito na ambos team y sigui brinda e mesun bunita weganan cu boso a demostra te cu awor.