Aruba Juniors a brinda homenahe na Urbano Kock y Erwin Croes

ORANJESTAD (AAN): E aña aki Sportvereniging Aruba Juniors a brinda homenahe na Urbano Kock y Erwin Croes.

Den un entrevista presidente di Aruba Juniors Luis Tromp a splica anualmente nan ta organiza un torneo di softball di Himno y Bandera.

Debi na e pandemia no a logra organiza e torneo pa e ultimo dos añanan, pero e aña aki si el a tuma lugar.

“Tur aña a tradicion ta pa reconoce dos baluarte y e aña aki a toca honor na Urbano Kock y Erwin Croes, kendenan ta dos persona cu durante añanan a sobresali den deporte”.

Urbano den futbol hungando pa Dakota, hungando pa seleccion di Aruba y Antiyas.

Despues el a sali campeon varios biaha cu Roma, segun Tromp.

Pa loke ta Erwin Croes, e presidente di Aruba Juniors a bisa cu e ta un deportista multiple.

Croes a hunga futbol, baseball y softball, mientras cu el a box tambe y na nivel internacional.

“E personanan aki merece wordo honra”, segun Tromp kende a menciona tambe cu e aña aki Aruba Juniors a celebra 90 aña di existencia.

El a indica cu otro siman lo cuminza cu e celebracionnan, cu ta inclui actividadnan di deporta pa e miembronan.

Na final ta bay tin un ceremonia tambe riba 2 di April, caminda cu lo instala dos miembro nobo di honor.