ORANJESTAD (AAN): Diadomingo atardi, Aruba su seleccion nacional masculino U20 di Futbol,
a competi den nan prome encuentro na Ciudad de Guatemala den e CONCACAF Under 20 Championship.
Aruba a cay den Group C. Esaki ta consisti di Guatemala, Curaçao, Aruba, Saint Martin (frances), y Barbados.
Seleccion di Aruba den nan prome wega, a enfrenta e oncena U20 di Curaçao. Esaki tabata na Estadio Doroteo Guamuch Flores, y e referee Jaime Herrera di El Salvador a guia e partido.
Coach Reinhard Breinburg a sali cu un oncena consistiendo di Keeper Jahmani Eisden, y demas hungadornan Jayden Kruydenhof, Dayron van Oers, Edhyon Hersilia, Finnidi Schokker, Mishawn Molina, Quion Poppen, Ludgeneson de Cuba, Enzo Cufhus, y Connor van Kilsdonk.
Na di 25 minuut, e delantero Connors van Kilsdonk durante wega, a haya un bunita cruze, cu chens pa scop un bala cu a bay straight den goal. Di e forma ey Aruba a bay dilanti den prome mitar cu score di 1-0.
Na di 45 minuut di wega, carchi geel a cay tanto pa Finnidi Schokker di Aruba, y tambe Cristian Pop di Curaçao.
Den segundo tempo, na di 53 minuut, Aruba a baha Schokker di veld y a laga Nathan la Cruz subi cancha. Na di 68 minuut a baha Jayden Kruydenhof, y na su lugar a drenta Basley Merveille. Na di 82 minuut a baha Ludgeneson de Cuba y na su lugar a drenta Joey Franken.
Curaçao na di 72 minuut a anota e goal danki na Tarino Marchena. Asina e wega a empata na 1-1.
Keeper di Aruba, Jahmani Eisden a ricibi carchi geel na di 90 minuut plus.
E substituto Nathan La Cruz kende a drenta na di 53 minuut, a haya dos carchi geel, pues el a ricibi uno cora y mester a baha di veld.
E siguiente wega di Aruba ta Diamars 6:00 pm (ora di Aruba), na momento cu e seleccion local lo enfrenta e team di St. Martin (frances). E team di Curaçao a sa di gana e team di St. Martin aki cu score di 1-0.
