E isla reforsa pa hopi futbolista yiu di tera biba na Hulanda
ORANJESTAD (AAN): Aruba su seleccion nacional masculino U20 di Futbol, a sali den fin di siman rumbo pa Guatemala unda lo participa den e CONCACAF Under 20 Championship, cu ta tumando lugar di 23 di Februari te cu 2 Maart na Ciudad de Guatemala.
E prome seleccion nacional cu lo representa Aruba pa e aña aki ta e seleccion masculino categoria U20 cu a mustra cu nan ta full cla pa participa den e CONCACAF U20, cu ta conta cu participacion di 27 pais cu a wordo parti den 6 grupo.
Aruba mes ta cay den Group C. Esaki ta consisti di Guatemala, Curaçao, Aruba, Saint Martin (frances), y Barbados.
Seleccion di Aruba ta consisti di e mihor hobennan futbolista di Aruba, y tambe e mihor futbolistanan di Aruba (naci na Aruba of famia Arubiano) cu ta biba na Hulanda. Assistant-Coach Leo Garcia ta biba na Hulanda, y a selecciona e mihornan. Nan ta viaha direct for di Hulanda pa Guatemala. Diabierna atardi e grupo di Aruba a subi vuelo di Copa Airlines pa bay Guatemala.
Segun assistant-coach Garcia, e weganan na Guatemala ta pa cualificacion. Garcia a splica cu e ta bibando 6 aña caba na Hulanda, y ey nan tin un bunita proyecto hinca den otro pa futuro di futbol di Aruba.
El a splica cu desde Augustus aña pasa caba a cuminsa cu e scout di e hungadornan aki di U20, pues ta 6 luna caba trahando na Hulanda riba esaki. E futbolistanan di Aruba cu ta biba na Hulanda, ta participando activamente na esaki. Varios ta naci na Aruba, y tin otronan naci na Hulanda, pero nan tata y mama ta procedente di Aruba. Segun Garcia a splica, e hobennan aki ta sinti nan mes orguyoso di por representa e isla den e torneo di CONCACAF. Tur coach y asistent tambe ta contento cu nan tin un ekipo asina entusiasma, y ta spera cu den e weganan aki nan lo por hisa e futbol di Aruba y hisa e isla na un otro nivel.
E staf tecnico cu a compaña e seleccion di Aruba ta Leo Garcia, Marco Portier, Reinhard Breinburg, Ronnie Nouwen, y Aron Maria.
E participantenan mes ta Josthan Maduro (Riverplate), Jahmani Eisden (Ijsselmeervogels), Deaquone Toussaint (FC Den Bosch), Dayron van Oers (FC Dordrecht), Adrian Santana (SV Blijdorp), Edhyon Hersilia (SV Britannia), y Junior Merveille (SV Dakota).
Tambe tin: Jayden Kruydenhof (AFC’34), Finnidi Schokker (AFC Quick 1890), Jeremy Trimon (SV Britannia), Quion Poppen (Spartaan 20), Ludgeneson de Cuba (SV Britannia), Joey Zaza Franken (SV Blijdorp), y Enzo Cuhfus (Go Ahead Eagles).
Tambe ta bay Isaac Kock (Alphense Boys), Joachim Kruydenhof (AFC’34), Nathan La Cruz (VVV Venlo), Mishawn Molina (Excelsior Rotterdam), Reangelo Boekhoudt (SV Riverplate), Tarik de Nobrega (SV Charlois), y Conner van Kilsdonk (NEC Nijmegen).
Di awor caba DIARIO ta desea e seleccion di Aruba, tur hungador y coach, tur clase di exito.
