APA den e pasonan final pa presenta su Master Plan cu ta abarca 4 punto importante

Director di APA Marc Figaroa: -*Crucero, Real Estate, Cargo y Sector Maritimo

ORANJESTAD (AAN) – Den conferencia di prensa, Director di Aruba Port Authority, Marc Figaroa, a trece dilanti su punto di bista tocante e reunion di APA cu Formador, Evelyn Wever-Croes, den marco di formacion di un gobierno nobo.

Director di APA a expresa na prome lugar, cu ta un honor pa APA ta parti di formacion di gobierno, y el a comenta cu sigur APA a trece hopi punto importante cu e gobierno nobo lo mester tene cuenta cune, pa asina APA por sigui desaroya su mes pa un compania mas sostenible y comercializa su mes den e contexto aki.

Figaroa a menciona cu APA ta den su pasonan final pa presenta su Master Plan, unda cu tin e cuater areanan cu ta: Crusero, Real Estate, Cargo y Sector Maritimo riba cual mester enfoca.

“Naturalmente nos tin e parti di Port City, cu ta sumamente importante pa APA y Aruba, unda cu nos mester bay tene cuenta cune y finaliza e detayenan chikito, pa asina nos por sigui den e siguiente fase pa ehecuta esaki”, director di APA Marc Figaroa a señala.

El a expresa cu e reunion cu Formador a bay den un ambiente hopi ameno y positivo, ya cu APA ta un organizacion di sumo  importancia pa Aruba en general, ya cu nos pais su economia ta start na APA.

Figaroa a referi tambe na e importancia di e waf di Barcadera, como cu e ta parti di APA, tanto su area di importacion como e terminal di operacion. “Seguramente, nos tin un Barcadera Master Plan cu ta bay desaroya parti di dje, cu ta cay bao e capa di Real Estate, cu ta un di e cuater puntonan cu nos a trece dilanti”, Figaroa a indica.

El a señala tambe cu e ta kere cu mester haci estudionan, y ya APA a haci cierto estudionan riba ki impacto esaki tin pa comercio di Aruba.

“Hopi di e cosnan ey ta percepcion, pero mi no kier bay den mucho detaye, pasobra tin un rapport, un analisis cu nos a haci, pero mester tene na cuenta cu Aruba su exportacion ta casi nihil. Pues, mester wak manera mi a trece dilanti poco dia ey, cu e container ta bin yen pero e ta bay bek bashi”, director di APA a remarca y a pone como ehemplo si un avion ta bin yen di Miami pero e ta bay bashi. Pues, e shipping ta loke ta haci e importacion mas caro.

“Pasobra como cu Aruba no ta exporta nada, e shipping line tin cu traha su placa riba e ruta completo y nos no tin control riba e prijs di e shipping” Figaroa a indica.

“Y bo ta wak cu aworaki China a hisa su prijs di shipping drasticamente, y esey no tin di haber cu wafnan di Aruba, pero puramente e shipping y esaki ta na consecuencia di e pandemia”, director di APA a subraya.

Tambe durante reunion cu Formador a toca e tema di e waf di e refineria y e asunto di ferry, riba lineanan halto pero no detaya. Pero a elabora riba e importancia cu e rol di APA lo mester hunga na dado momento riba esey, mirando e capacidad cu Aruba tin pa realiza esaki y teniendo cuenta cu e region. “Con cu bay bin no ta Aruba so, pero bo tin full e region na unda Jamaica, Colombia, Trinidad tambe tin wafnan grandi cu Aruba ta compitiendo cune. Dus, nos mester haci cierto estudionan pa cu esaki”, Marc Figaroa, director di APA, a conclui.