A pone cinco sensor na Surfside Beach pa studia e calidad di awa di lama

Proyecto Surfside Science:

ORANJESTAD (AAN):  Diamars anochi tabata tin un presentacion di Surfside Science tocante calidad di awa di lama. Suyin Ridderstaat, Coordinador di Comunicacion a laga sa cu e siman aki a presente tur anochi algun di e temanan di loke nan a midi relaciona cu medio ambiente.

            El a splica riba e proceso cu nan a pasa henter aña pa traha e sensornan, pa colecta e data, y con tur esey a bay. Cada miembro di e team a splica di nan parti.

            Segun Ridderstaat,  pa loke ta awa, nan a midi oxigeno, acidez, tambe e coriente di e awa. Esakinan ta den un box cu ta un sensor cu ta bay den awa. E idea ta pa e keda pa sigui midi e data y pa asina tin'e durante e añanan cu ta bay bin.

            Banda di esaki a haci comparacionnan cu e sensornan cu a wordo uza cu esunnan mas caro y sofistica pa asina por bisa si e data ta valido pa por wordo uza, a splica.

            Surfside Beach tabata e beach piloto pa un aña largo. E aña aki tabata pa traha e traha e metodonan, e mashinnan pa test akinan y wak si nan ta traha pa despues bay pone nan otro caminda.

            Aworaki tin cinco sensor pa analisa e calidad di awa. Tin sensornan tambe pa studia calidad di aire y riba esey tambe a wordo papia siman pasa.

            El a agrega cu tambe siman pasa a papia riba entre otro e 'rif islands',  vegetacion, con e costa ta cambiando y e mapeo di fondo di lama.