A cuminza haci tereno limpi di warehouse kima di Lucky Super Store pero atardi candela a start atrobe

ORANJESTAD (AAN): Tabata e anochi di Diaranson 30 di December 2020, cu banda di 8’or di anochi un warehouse grandi den Italiestraat cu ta pasa di un blok bay te otro banda den Engelandstraat a cuminza kima.

   Dos compania local tabata huur espacio den e warehouse aki, esta Lucky Super Store na e parti di Italiestraat, y Divi Resorts na e parti den Engelandstraat.

   E candela a kima full e edificio, pues el a afecta tanto mercancia di Lucky Super Store como tambe mercancia di Divi Resorts.  E bon trabao di Cuerpo di Bombero a evita cu e edificio banda pabao di Visser Holding a kima.

   For di e tempo ey a keda cu trabao di investiga e causa, y tambe sigui check mey-mey di e ruinanan cu a keda basha abao.

   CANDELA ATROBE:

   Ta parce cu awor si, despues di casi 4 luna, cu e investigacion di autoridad y di aseguro a finaliza, y riba Diahuebs por a mira dos heavy equipment presente pa asina cuminza kita tur ruina di riba e tereno.

   Diahuebs den oranan di atardi, cualkier material flamable cu tabatin eynan diripiente a cuminza kima net durante e trabao di limpieza.  Huma preto tabata sali di eynan.

   Posiblemente durante e trabao di haci lugar limpi, lo a mishi of move material cu ta contene material flamable (kizas hasta bateria di lithium-ion), y esaki a bolbe cende parti di e area aki na candela, manera por mira riba e potret.