Rocco Tjon orguyoso cu a inverti 321 miyon den FASE y Subsidio di Salario

ORANJESTAD (AAN): Dentro di poco tin eleccion y esey ta e motibo di con opositornan politico ta trata na trece informacion incorecto pa dilanti. Na momento

cu Aruba a worde confronta cu e pandemia Gobierno a percura pa presenta un presupuesto cu diferente programa di alivio pa esunnan mas afecta.

   Asina a brinda entre otro FASE, Loonsubsidie y tambe ayudo financiero na comerciantenan medio grandi y chikito den e forma di 4 mil Florin pa kwartaal.

    Presupuesto 2020 tabata den mi concepto e presupuesto di mas importante. Pasobra akinan a brinda hopi famia asistencia financiero. Lamentablemente ni akinan AVP por a mustra madurez politico y nan NO a vota na fabor di e presupuesto.

   Te cu februari 2021 tin casi 12 mil persona a worde yuda door di FASE. Esaki ta suma un total di 50 miyon Florin. Y pa loke ta Loonsubsidie ta asina cu 1500 compania a haya e ayudo aki, pa asina 18 mil trahador por a keda cu nan trabao. Y esaki a suma un total di 271 miyon Florin.

   Promedio di 4.000 persona pa luna ta haya FASE

   E programa di FASE ta yuda tur luna un averahe di 4000 persona. Y e ayudo aki ta pa comerciante independiente sin trahador y trahador. Tambe a incorpora e grupo di taxista, buschaufeur, y nos artistanan local den e programa. Asina a trata na alivia e impacto un poco pa nan tambe.

   Door di e situacion cu a presenta y e programa di FASE a bin ta realisa cu mester tin un “vangnet sociaal” mas moderno y mas eficiente. Y pa e motibo aki Minister Glenbert Croes a introduci e programa “Tijdelijke Inkomen Ondersteuning”.

   FASE ta un programa cu a worde realisa danki na e pueblo di Aruba. Esaki no ta a base di e fianza haci cerca Hulanda. Como pais nos ta para dilanti retonan grandi y tur politico mester mustra madurez politico aworaki. Nos ta spera cu tur Parlamentario lo aproba presupuesto 2021, pa asina por sigui brinda ayudo na tur famia. Gabinete Wever-Croes a hiba un maneho responsabel prome cu e pandemia y durante e pandemia. Y esaki lo ta e manera cu Gabinete Wever Croes II lo sigui goberna despues di 25 di juni 2021.